Qyrǵyzstannyń Nú-Iorktegi BUU janyndaǵy turaqty ókildigi uıymǵa múshe elderdi qazaq-qyrǵyz shekarasynda qalyptasqan jaǵdaıdan habardar etti, dep Qamshy.kz aqparat agenttigi Azattyqqa súıene otyryp jazady.
Qyrǵyzstan syrtqy ister mınıstrliginiń baspasóz qyzmeti 17 qarashada BUU shtab-páterinde Bas Assambleıanyń ekinshi komıtetiniń otyrysynda ekonomıkalyq, ekologıalyq jáne qarjylyq máselelerge qatysty birsypyra qarar qaralǵanyn habarlady.
«Bir jaqty ekonomıkalyq sharalar - damýshy elderdi saıası jáne ekonomıkalyq turǵydan májbúrleý sharalary retinde» dep atalatyn qarardy talqylaý kezinde Qyrǵyzstan ókili Mırgúl Moldoısaeva Qazaqstannyń 10 qazannan bastap shekarada «adam, kólik pen taýardyń erkin ótýine qoldan kedergi jasap otyrǵanyn» málimdegen.
«BUU-ǵa múshe elder qazaqstan-qyrǵyzstan shekarasynda qalyptasqan jaǵdaıdan, Qyrǵyzstan ekonomıkasyna zıan keltirý úshin jáne eldiń ınvestısıalyq ári týrısik tartymdylyǵyna nuqsan keltirý maqsatynda ekonomıkalyq jáne transporttyq blokada qoldanylyp jatqanynan habardar etildi» delingen syrtqy ister mınıstrliginiń habarlamasynda.
Qararda bir de bir memleket basqa memleketti ózine táýeldi qylý maqsatymen birjaqty ekonomıkalyq, saıası ıa basqa qandaı da bir sharalardy qabyldaı almaıtyny aıtylǵan. Qyrǵyzstan delegasıasy qujat qabyldansa ol eldiń ornyqty damýyna nuqsan keltirip, yntymaqtastyqty buzatyn kedergilerdi joıýǵa túrtki bolatynynan úmitti ekenin bildirgen.
Qyrǵyzstan atalǵan qarardyń qabyldanýyn qoldap daýys bergen.
7 qazanda Qyrǵyzstan prezıdenti Almazbek Atambaev prezıdenttikke keıbir kandıdattar men Qazaqstan bıliginiń atyna qatar syn aıtqan. Osydan kóp uzamaı, 10 qazanda Qazaqstan Qyrǵyzstanmen shekarada tekserýdi kúsheıtip, shekaranyń qyrǵyz jaǵynda júk kólikteriniń kezegi paıda bolǵan. Taraptar 19 qazannan bastap jolaýshylar kóligi men júgi bar jolaýshylardy ótkizýdi jeńildetýge kelisken bolatyn.
Astana shekaradaǵy tekserýdi Qyrǵyzstannan keletin «kontrabandamen kúresý úshin» kúsheıtkenin aıtady. Bishkek Qazaqstan shekarada «qoldan kedergi jasap otyrǵanyn» aıtyp, Dúnıejúzilik saýda uıymyna jáne Eýrazıa ekonomıkalyq odaǵyna (EAEO) júgingen.
