Astanada Qazaqstan Respýblıkasynyń Memlekettik hatshysy Gúlshara Ábdiqalyqovanyń qatysýymen «Rýhanı jańǵyrý» baǵdarlamasy aıasynda tuńǵysh ret eldegi úzdik úkimettik emes uıymdarǵa (ÚEU) syıaqy tapsyrý saltanatty rásimi ótti dep habarlaıdy Qamshy.kz aqparat agenttigi.

İs-sharaǵa sondaı-aq Parlament depýtattary, memlekettik organdar men ÚEU ókilderi jáne qalyń jurtshylyq qatysty.

Memlekettik hatshy óz quttyqtaýynda Elbasy N.Á.Nazarbaevtyń: «Azamattyq qoǵam, sonyń ishinde úkimettik emes uıymdar – demokratıanyń ajyraǵysyz bólshegi» degen sózin atap ótti.

Áleýmet belsendiligin arttyrmaıynsha qoǵamdyq sanany jetildirý múmkin emes. Úkimettik emes sektor osy úrdistiń ajyraǵysyz bólshegi bolyp tabylady.

Táýelsizdik jyldarynda qazaqstandyq ÚEU jaqsy tájirıbe jınady. Búginde elimizde 19 680 ÚEU tirkelgen. Olar ásirese Astanada, Almatyda, Ońtústik Qazaqstan, Qaraǵandy jáne Qyzylorda oblystarynda belsendirek. Onda 29 myń adam jumyspen qamtylyp otyr. Memlekettik áleýmettik tapsyrys pen memlekettik granttar qoldanylady. Memlekettik áleýmettik tapsyrys aıasynda sońǵy 2 jylda ÚEU quny 23 mlrd. teńgeden joǵary 4 myńnan astam áleýmettik joba júzege asyryldy. 2016 jyldan bastap jobalardy memlekettik grant arqyly qarjylandyrý ádisi engizildi. Osy ýaqyt ishinde jalpy quny 800 mln. teńgeden asatyn 70-ke jýyq joba iske asyryldy.

Syıaqy ÚEU-ǵa respýblıkalyq, salalyq jáne óńirlik deńgeıdegi áleýmettik máselelerdi sheshkeni úshin 15 nomınasıa boıynsha beriledi. Ár nomınasıanyń syıaqy mólsheri – 4,5 mln. teńge.

Barlyǵy 230 ótinim kelip tústi. Eń kóp ótinim myna baǵyttar boıynsha tirkeldi: halyqtyń áleýmettik turǵydan osal toptaryn qoldaý – 53 ótinim nemese 23%, jastar saıasaty men balalar bastamalaryn qoldaý – 28 ótinim nemese 12,2%, azamattar men uıymdar quqyqtaryn, zańdy múddelerin qorǵaý – 18 ótinim nemese 7,8%, qoǵamdyq kelisim men  jalpyulttyq birlikti nyǵaıtý – 18 ótinim nemese 7,8%.

58 ÚEU syıaqy ıegeri atandy. Olardyń arasynda – «Ardager» qoǵamdyq birlestigi, Qazaqstan Respýblıkasy Prezıdentiniń «Bolashaq» Halyqaralyq stıpendıasy stıpendıattary qaýymdastyǵy, «Jenskıı lých» qoǵamdyq birlestigi, «Pravo» qoǵamdyq qory, «Enactus Kazakhstan» jekemenshik qory jáne basqa uıymdar bar.      

İs-shara aıasynda elimizdiń maıtalman ónerpazdarynyń qatysýymen konserttik baǵdarlama ótti.