Almatyda 24 jastaǵy jigit izdestirilip jatyr. Ol 5 kúnnen beri habar-osharsyz ketken. Týystarynyń aıtýynsha, Álıhan Ishımov jumbaq jaǵdaıda joǵalǵan. Óıtkeni, jigittiń temir tulpary áýejaı jaqtaǵy ózen mańynan tabylypty. İshinde ıesine tıesili zattardyń bári sol qalpy qalǵan. Qazir joǵalǵan jigittiń sýreti áleýmettik jeliler men basylymdarǵa jarıalandy, dep habarlaıdy Qamshy.kz aqparat agentitgi Almaty arnasyna silteme jasap.
Álıhan Ishımov 16 qarashada keshkisin kólikteri buzylyp, jolda qalǵan dostaryna kómek berýge úıinen shyǵyp ketken. Anasyna kóp uzamaı oralýdy eskertipti. Alaıda, jas jigitten sodan beri habar joq. Al, temir tulpary Almaty áýejaıynyń janyndaǵy ózen mańynan tabylypty.
Álıhan tizgindegen kólikti týystary ertesinde tańǵy saǵat 10-dar shamasynda dál osy ózen mańynan taýyp alypty. Eń qyzyǵy kóliktiń esigi ashyq turǵan. İshinde kilti men ıesiniń uıaly telefony, sondaı-aq aqsha men qujat salynǵan ámıany aman-saý turǵan.
Qazir, jumbaq jaǵdaıda joǵalǵan jigitti týystary men dostary sharq uryp izdestirýde. Olar, Álıhannyń eshkimmen arazdyǵy joq, kishipeıil jigit ekenin alǵa tartty. Al, kóligi tabylyp ishindegi aqshasyna deıin saý turǵany kóńilge kúdik uıalatady deıdi.
«Ony 18-i kúni osy aýmaqtardan kishkentaı balalar kóripti. Olar Álıhannyń kıgen kıimderin dálme-dál sýrettep berdi. Ústinde jasyl kýrtka, qara sporttyq shalbar men krosovkı bolǵan. Bilmeımiz, ne oılarymyzdy, qaıda ketkenin. Tek aman-esen oralsa eken deımiz. Sol kúni ekeýimiz kezdesý kerek edik, sáti kelmedi»,-dedi Á.Ishımovtyń dosy, Ernaz Túsipov.
Álıhandy tabý úshin ata-anasy qoldarynan kelgenniń barlyǵyn jasap baǵýda. Olar balalarynyń kóligin tapqan boıda, polısıaǵa habar beripti. Alaıda, ondaǵylar sharasyz ata-anany bir aýdannan, ekinshi aýdanǵa sendeltip qoıǵan kórinedi.
«Túrksib aýdanynyń İshki ister basqarmasyna baryp ótinish jazdyq. Olar shamamen balamyzdyń qaıda ketkenin surady da, bizdi Alataý aýdanyna jiberdi. Ondaǵylar, kólikti áýejaı mańynan taptyńdar dep, qaıtadan Túrksib aýdanyna jiberdi. Ótinishimizdi Túrksib aýdanyna joldadyq, dúısenbiden bastap olar aınalysady dep habarlady. Biraq, eshqandaı nátıje joq. Eshkim habarlaspady. Jumys istegisi kelmeıdi»,-dedi Á.Ishımovtyń anasy, Gaýhar Ishımova.
Alaıda, qalalyq İshki ister departamentindegiler izdeý júrgizilip jatqandyǵyn jáne qazir bolǵan jaǵdaıdyń birneshe nusqasy baryn habarlady. Biraq, bul aqparatty tergeý múddesi úshin jarıa etpedi. Al, Álıhan Ishımovtyń týystary ony kórgen kýágerlerden qandaı da bir málimet kútýde.
