QR Úkimet basshysy Baqytjan Saǵyntaev zeınetaqy qarjysyn jeke kompanıalardyń basqarýyna berý merzimin atady. Bul jaıynda Premer-Mınıstrdiń depýtattyq saýalǵa bergen jaýabynda málim boldy, dep Qamshy.kz aqparat agenttigi QazAqparatqa súıenip habarlaıdy.

«Atalǵan máseleni egjeı-tegjeıli pysyqtaý úshin jeke basqarýshy kompanıalardyń basqarýyna zeınetaqy aktıvterin berý boıynsha sharalardy oryndaý merzimi 2018 jyldyń sońyna deıin belgilendi»,-dep atap ótilgen saýalǵa berilgen jaýapta.

Úkimet basshysy QR Ulttyq  banki jeke basqarýshy kompanıalarǵa zeınetaqy aktıvterin berý turǵysynda usynysty ázirlegenin eske salyp ótti. 2016 jáne 2017 jyldardyń barysynda bul usynystar Ekonomıkalyq saıasat jónindegi keńeste birneshe márte talqylandy, sondaı-aq qazirgi ýaqytta Qazaqstannyń qarjy uıymdarynyń qaýymdastyǵy alańynda bıznes-qoǵamdastyqpen talqylanýda.

Zeınetaqy aktıvterin ishki naryqtaǵy jeke basqarýshy kompanıalardyń basqarýyna berý rásimderin anyqtaýmen qatar, Ulttyq bank zeınetaqy aktıvteri bóliginde ındekstik ınvestısıalaý úshin sheteldik basqarýshylardy tartý boıynsha jumystardy júrgizýde.  «Qazirgi ýaqytta jahandyq aksıalar men oblıgasıalardyń mandattary boıynsha sheteldik basqarýshy kompanıalardyń syrtqy basqarýyna zeınetaqy aktıvterin berý jumystary júrgizilip jatyr.

Ol kompanıalar - Qazaqstannyń Ulttyq qorynyń aktıvteri jáne Ulttyq banktiń altyn-valúta aktıvteriniń syrtqy basqarýshylary. Sondaı-aq «Jahandyq belsendi aksıalar» mandaty boıynsha jańa syrtqy basqarýshylardy tańdaý jumystary júrgizilýde», - delingen habarlamada.  Zeınetaqy aktıvterin syrtqy basqarýǵa berýdi aǵymdaǵy jyldyń sońyna deıin bastaý josparlanýda.