Bet-álpetti búrkemeleıtin kıim kıýge tyıym salýdyń dinge qatysy joq, ol qoǵamdyq qaýipsizdik úshin qajet. Bul týraly Din isteri jáne azamattyq qoǵam mınıstri aıtty, dep jazady  Qamshy.kz aqparat agenttigi Astana arnasynyń jańalyqtar qyzmetine silteme jasap.

Búgin din, dinı birlestikter týraly zań jobasyna engizilgen ózgerister men tolyqtyrýlardy talqylaý boıynsha dıpkorpýs ókilderi úshin brıfıń ótti.

Nurlan Ermekbaevtyń aıtýynsha, betti tumshalap kıiný quqyqqorǵaý organdarynyń tulǵany tanýyna kedergi jasaıdy. Bul normaǵa qatysty azamattardyń, úkimettik emes uıymdardyń, memlekettik qyzmetkerler men sarapshylar pikiri eskerilgen. Belgıa, Fransıa sekildi basqa elderdiń de tájirıbeleri eskerilgen. Mınıstrdiń aıtýynsha, olar nıkab, hıdjab kıýge tyıym salý adam quqyn buzbaıdy degen sheshimge kelgen. 

«Bul tikeleı dinı máselege qatysty emes, shyn máninde ol qoǵamdyq qaýipsizdik máselesi. Mysaly, nıkab, chadra, palaklava nemese betperde sekildi kıim kıý quqyqqorǵaý organdarynyń jumysyna kedergi jasaıdy. Demek qoǵamdyq qaýipsizdikti qamtý boıynsha sharalardyń tıimsiz bolýyna ákeledi. Sondyqtan onyń dinge qatysy joq», - dedi QR Din isteri jáne azamattyq qoǵam mınıstri Nurlan Ermekbaev.