Oral soty oramal taǵatyn qyzdyń ákesiniń shaǵymyn qanaǵattandyrmady, dep Qamshy.kz aqparat agenttigi Azattyqqa silteme berip jazady. 

Oral qalalyq №2 sotynyń sýdıasy Gúlnar Masaýrova №7 orta mekteptiń birinshi synybynda oqıtyn qyzdyń ákesi Áset Sultannyń azamattyq shaǵymyn qanaǵattandyrýdan bas tartty. Áset Sultan qyzynyń sabaqqa oramal taǵyp barýyna ruqsat berýdi suraǵan bolatyn. 

Bul is boıynsha jaýapker, №7 mekteptiń dırektory Vıktor Protasov sot sheshimine qatysty komentarı berýden bas tartty.

Jaýapker taraptyń ókili ári zańger Arman Ábdirashıt Azattyqqa sot sheshimine shaǵymdanatynyn aıtty. Ábdirashıttiń sózinshe, Oraldaǵy №9 jáne №37 mekteptiń oramal taǵatyn birneshe oqýshysynyń ata-anasy da sotqa joǵarydaǵydaı talaptarmen shaǵymdanǵan. Ol shaǵymdardy da sýdıa Gúlnar Masaýrova qaraıdy.

Ótken aptada Astanada Aqtóbe jáne Batys Qazaqstan oblystaryndaǵy ondaǵan oqýshynyń ata-anasynyń mektepte oramal taǵý daýyna qatysty shaǵymy boıynsha sot bastalǵan. Ata-analar bilim jáne ǵylym mınıstrliginiń 2016 jyly qańtardyń 14-i kúni shyqqan №26 buıryǵynyń 13-tarmaǵyn Qazaqstan Konstıtýsıasyna jáne halyqaralyq kelisim-sharttarǵa qaıshy dep tanýdy talap etip otyr. Ol buıryq negizinde mektep formasynyń biryńǵaı erejesi engizilgen. Erejege saı, mektep oqýshylary pıdjak, keýdeshe, jeıde, shalbar, klasıkalyq jeıde (qys kezinde qalyń keýdeshe, sarafan) kıýi kerek. Al balalary mektepke oramal taǵyp baratyn ata-analar bilim mınıstrligi konstıtýsıalyq quqyǵymyzdy shektep otyr dep sanaıdy.