Shymkent qalasyna  eńbek jáne halyqty áleýmettik qorǵaý vıse-mınıstri Svetlana Jaqypova keldi, dep jazady Qamshy.kz aqparat agenttigi.

Qazaqstanda 2018 jyly engiziletin jańa formattaǵy áleýmettik kómek kórsetýge daıyndyq barysymen tanysý úshin Svetlana Jaqypova shyraıly Shymkent qalasyna keldi. 

Oblystyq ákimdikte ótken májiliste osynaý másele jan-jaqty talqylandy. Onda tıisti kómek kórsetetin sala qyzmetkerleri men mekemelerdiń ázirligi pysyqtaldy.

Aldaǵy jyl áleýmettik sala qyzmetkerleri jańartylǵan júıede usynylatyn áleýmettik kómek kórsetýge saqadaı saı daıyn bolýy tıis.

Sala basshysynyń sózine sensek, osynaý kómekke muqtajdar sany kelesi jyly 300 myńǵa jýyq. Olardyń 74 myńy shartsyz, 222 myńy shartty áleýmettik kómekpen qamtylady dep kútilýde.

Búgingi tańda atqarylyp jatqan jumystarmen tanysý  úshin Svetlana Jaqypova áleýmettik mekemelerdi aralyp kórdi. Onyń ishinde jýyrda ǵana ashylǵan Shymkenttegi №1 arnaýly áleýmettik qyzmet kórsetý ortalyǵynyń qosymsha 110 oryndy ǵımaraty. Munda 18 jastan asqan psıho-nevrologıalyq aýrýlary bar İ jáne İİ toptaǵy azamattar arnaýly áleýmettik qyzmettermen qamtamasyz etiledi. 

Óziniń Shymkentke jasaǵan sapary barysynda Svetlana Jaqypova jobany ótken jyly sátti júzege asyrǵan áriptesterine senimin bildirdi.