Memleket paıdasyna polısıa ınspektory 1 mln 361 myń 400 tenge kóleminde aıyppul tóleýge mindetteldi. Jol erejesin buzǵan kólik júrgizýshisi de jaýapkershilikten qutyla almady, oǵan salynǵan aıyppul 453 800 teńge. Sot tarapynan syıaqy berý jáne alý deregi boıynsha, jol saqshysy jáne kólik júrgizýshisin birdeı jaýapqa tartý buryn sońdy oblys kóleminde bolmaǵan jaǵdaı. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti habarlady dep jazady Qamshy.kz aqparat agenttigi.

Ústimizdegi jyly tamyzdyń 1 kúni saǵat 16:40 shamasynda Mańǵystaý oblysy İİD Jergilikti polısıa qyzmeti jol-patrýldik qyzmetiniń ınspektory T.Baqytov, "Aqtaý-Qalamqas" tas jolynyń 97 shaqyrymynda azamat S.Qadyrbaevtyń basqarýyndaǵy júk kóligin toqtatyp, qujattaryn teksergen. Alaıda kólik júrgizýshisiniń qujattary tolyq bolmaı shyqqan, sol kezde azamat S.Qydyrbaev jol saqshysyna 1000 teńge kóleminde zańsyz syıaqy bergen. 

Bul derekti Mańǵystaý oblysy ishki ister departamenti ózindik qaýipsizdik basqarmasynyń qyzmetkerleri anyqtap, jol ınspektorynyń ústinen qylmystyq is qozǵaý úshin óndiris ashyp, oblystyq sybaılas jemqorlyqqa qarsy is-qımyl Ulttyq búrosyna joldaıdy. Alaıda Ulttyq búro tarapy polısıa qyzmetkerin qylmystyq jaýapqa tartý týraly óndiris qozǵamaǵan, sebebi zańsyz syıaqy mólsheri eki aılyq eseptik kórsetkish mólsherinen aspaǵan. Sol sebepti jol saqshysyn jáne kólik júrgizýshisin ákimshilik jaýapqa tartý úshin, qozǵalǵan ákimshilik is QR Memlekettik qyzmet isteri jáne sybaılas jemqorlyqqa qarsy is-qımyl agenttigi Mańǵystaý oblysy boıynsha departamentine joldaǵan. 

Óz kezeginde kólik júrgizgen azamat S.Qydyrbaev óziniń zańsyz áreketin ákimshilik jazadan qutylý úshin osyndaı áreketke barǵanyn aıtyp túsindirip, 1000 teńge kóleminde zańsyz syıaqyny polısıa qyzmetkerge usynǵanyn aıtqan. Al zańsyz syıaqy alǵan jol saqshysy bolsa, QR ákimshilik quqyq buzýshylyq týraly Kodeksiniń 677 babyn buzdy dep aıyptaldy. Nátıjesinde, sot qaýlysyna sáıkes polısıa ınspektory 600 aılyq eseptik kórsetkish mólsherinde memleket paıdasyna aıyppul tóleýge mindetteldi.

"Sottyń eki jaqty birdeı jaýapkershilikke tartyp, osyndaı iri mólsherde aıyppul salýy Mańǵystaý oblysynda bolǵan birinshi jaǵdaı. Iaǵnı, polısıa qyzmetkerine salynǵan 1 mln. 400 myń teńgege jýyq aıyppul az emes. Al kólik júrgizýshisi bolsa 200 aılyq eseptik kórsetkish mólsherinde, ıaǵnı 453 800 teńge aıyppul tóleıtin boldy. Bul Túpqaraǵan aýdandyq mamandandyrylǵan ákimshilik sotynyń qaýlysy. Zań barlyǵyna ortaq. Sol sebepti jol erejesin qatań saqtap júrýge barlyǵymyz mindetti ekenimizdi eske salǵym keledi jáne bul jaǵdaı basqalarǵa sabaq bolar degen úmittemiz", - deıdi QR Memlekettik qyzmet isteri jáne sybaılas jemqorlyqqa qarsy is-qımyl agenttigi Mańǵystaý oblysy boıynsha departamentiniń basshysy Nurgúl Jannazarova.

Taraptar qaýlyǵa on kún ishinde Mańǵystaý oblystyq sotynyń azamattyq isteri jónindegi sot alqasyna shaǵym nemese ótinish bere alady.

Óz kezeginde Nurgúl Jannazarova, agenttik tarapynan joldarda sybaılas jemqorlyq áreketterin barynsha tómendetýge baǵyttalǵan 10 qadam jospary jasaqtalǵanyn aıtady. Onyń aıasynda, azamattardyń aryz-shaǵymdary qaralyp, tıisti sharalar alynady. Eń bastysy sybaılas jemqorlyq sıpatyndaǵy quqyq buzýshylyqtardyń jolyn kesý jáne aldyn-alý jumystary júrgiziledi.

Bul rette, departament janynan qurylǵan sybaılas jemqorlyqqa qarsy kúres jónindegi mobıldik toptyń atqaryp jatqan jumysy orasan, onyń quramyna memlekettik qyzmet jáne sybaılas jemqorlyqqa qarsy kúres departamentinen bólek, dinı basqarma, úkimettik emes uıymdar, jýrnalıser jáne "Nur Otan" partıasynyń ókilderi kiredi.