Almatydaǵy M.Áýezov atyndaǵy Qazaq Memlekettik akademıalyq drama teatrynda Astananyń 20 jyldyǵyna arnalǵan halyq ánderin oryndaıtyn jyrshylardyń halyqaralyq «Uly Dala Eli» festıvali ótti.
Búgingi tańda Almatyda «Rýhanı jańǵyrý» baǵdarlamasy aıasynda dástúrli ónerdi qoldaý jáne jańǵyrtý barysynda júıeli jumystar júrýde, osydan bir aı buryn ǵana Almatynyń mádenıet pen shyǵarmashyl qala retinde IýNESKO-nyń shyǵarmashyl qalalar Jelisine enýi de sondyqtan.
«Alataý» dástúrli óner teatrynyń jáne dástúrli mýzykanyń mýltımedıalyq ortalyǵynyń ashylýy bizdiń mádenıetimizdiń damýyna jańa serpilis berdi jáne dástúrli oryndaýshylar úshin jańa múmkindikter ashty», - dep atap ótti Almaty ákimi B.Baıbek.
Ótken jyly halyqtardyń ulttyq ónerin tanytatyn «Uly dala eli» halyqaralyq jyrshy-termeshiler festıvali, «Áýenmen terbelgen myń jyl» atty dástúrli mýzyka festıvali, «Altyn dombyra» aqyndar aıtysy, Yqylas atyndaǵy mýzykalyq aspaptar mýzeıi negizinde «İnjý marjan» telebaǵdarlamasy ótti.
Almatynyń 1000 jyldyǵyn merekeleý aıasynda ótken jyly halyqaralyq «Uly Dala Eli» festıvali uıymdastyrylyp, oǵan Túrkıanyń, Qyrǵyzstannyń, Túrkmenstannyń, Ázerbaıjannyń jyrshylary qatysty, «Marko Polo izimen» halyqaralyq festıvalinde Fransıadan, Gresıadan, Indıadan, Irannan, Shveısarıadan, Armenıa men basaqa da elderden kelgen artıser óner kórsetti.
Festıváldiń ashylý barysynda Qazaqstandaǵy Fransýz Respýblıkasynyń Elshisi Fılıpp Martıne qazaq tilin jaqsy biletinimen jınalǵandardy tańdandyrdy jáne aqyn, jyrshy Uljan Baıbosynovaǵa Fransıa Mádenıet mınıstrliginiń «Óner jáne Ádebıet Kavaleri» ordenin tabys etti.
Fransıa Elshisi ordendi Almatyda ótken «Uly dala eli» etnofestıvalinde saltanatty túrde tapsyrdy. Ol Fransıa Mádenıet mınıstriniń arnaıy tapsyrmasymen Eýropadan joldanǵan qurmetke qazaq jyrshysy laıyq ekenin aıtty.
«Bul orden Fransıa Respýblıkasynyń ǵana emes, sonymen qatar búkil álem mádenıetin damytýǵa qosqan zor úlesi úshin beriledi. Kásibı sheberligińiz arqyly Sizdi eń úzdik jyrshy jáne kúıshi retinde tanıdy», - dep atap ótti Fılıpp Martıne.
«Uly dala eli» etnofestıvali tamasha joba. Búgingi keshte maǵan Qazaqstannyń ońtústik óńirinen kelgen jyrshylar men Qaraqalpastannan kelgen ónerpazdyń oryndaýyndaǵy jyrlar qatty unady. Olardyń daýysy men mýzykalyq aspapta oryndaýy sheber shyqty. Men búgingi keshke Astanadan Uljan Baıbosynova úshin keldim. Ol Fransıamen, Qazaqstandaǵy bizdiń elshilikpen birge burynnan jumys istep kele jatyr. Onyń eńbegi zor. Fransıada Ortalyq Azıa mýzykasyn súıip tyńdaıtyndar kóp. Onyń ishinde qazaq áni tyńdarmandarynyń klýby bar», - dedi Fransıa Elshisi.
Uljan Baıbosynova «Uly dala eli» jobasy jaýapkershiligi zor joba ekenin jetkizdi.
«Jyrshylyq, jyraýlyq ónerdiń qanshalyqty tereń ekeni belgili. Sol sebepti buǵan úlken jaýapkershilikpen qaraýǵa týra keledi. Tereń maǵynaly murany baǵasyn túsirmeı halyqqa jetkizý basty muratymyz boldy. Barlyq qazaqqa ortaq óner bolǵandyqtan búgingi kúngi oryndaýshylary men izin jalǵastyrýshy urpaqtaryn qamtý qajet», - dedi Uljan Baıbosynova.
