Nıderlandtaǵy Gronıngentik ýnıversıtet psıhologtary «bir kórgennen ǵashyq bolý» fenomenine qatysty zertteý júrgizgen. Zertteýshiler  mundaı sezimniń bar ekenin joqqa shyǵaryp otyr dep jazady Independent.

Zertteýdiń birinshi bóliminde barlyǵy ınternet arqyly 396 adamnan turatyn qatysýshylardan  saýalnama júrgizilgen. Qatysýshylardyń shamamen 60 paıyzy áıel adamdar bolǵan. Olardan qazirgi ýaqyttaǵy qarym-qatynastary týraly surap,  belgisiz adamdardyń fotosýretterin kórsetken.

Qatysýshylar sýrettegi adamdardyń ózderine qanshalyqty unamdy, symbatty ekenderin, olardyń fotolaryna qaraǵanda qandaı emosıalyq kúı keshetinin aıtyp, sol sezimderin sýrettep berýi kerek bolǵan. Sonymen birge, qatysýshylardan osy adamdardy kórgende qandaı da bir ǵashyqtyqty sezetinin nemese  bir kórgennen ǵashyq bolý sıaqty sezimdi bastan keshirý múmkindikterin zerttegen.

Tájirıbeniń ekinshi bóliminde qatysýshylarǵa jyldam kezdesýlerge qatysyp kórý usynylǵan. Bir-birin tanymaıtyn eki adamǵa tanysyp, bilisýge  20 mınýt nemese jarty saǵat ýaqyt berilgen.

Osy zertteý nátıjesi boıynsha, 49 jaǵdaıda adamdar bir kórgennen ǵashyq bolý sezimin bastan keshkenderin jetkizgen.

Ǵalymdardyń baıqaýynsha, kezdesý men tanysýlar barysynda belgisiz adam qanshalyqty symbatty kórikti bolǵanyna baılanysty qatysýshylar serikterine degen ǵashyqtyq seziminiń paıda bolǵanyn aıtqan. Alaıda, mundaı ǵashyqtyq sezim kóp jaǵdaıda jaýapsyz bolǵan. Demek, adamnyń bir kórgennen ǵashyq bolýy jáı ǵana qumarlyq pen yntyqtyq sezimderine baılanysty deıdi ǵalymdar.