«Ekspo-2017» halyqaralyq kórmesi aıasynda ótkizilgen mádenı sharalardyń qorytyndysy týraly búgin QR Úkimetiniń baspasóz ortalyǵyndaǵy baspasóz konferensıasynda mádenıet jáne sport vıse-mınıstri Aqtoty Raıymqulova men «Astana Opera» teatry dırektorynyń birinshi orynbasary Tóleýbek Álpıev aıtyp berdi.
A. Raıymqulovanyń aıtýynsha, Memleket basshysynyń tapsyrmasymen Mádenıet jáne sport mınıstrligi «Ekspo-2017» halyqaralyq mamandandyrylǵan kórmesiniń mádenı-oıyn-saýyq jáne sport sharalarynyń keshendi baǵdarlamasyn ázirledi ári ol sátti iske asyryldy deýge bolady.
«Mádenıet jáne sport mınıstrligi «Astana Ekspo-2017»-men jáne elorda ákimdigimen birlesip, Astanada joǵary deńgeıde túrli janrdaǵy 8 myńnan astam (8 460) mádenı jáne sport sharalaryn uıymdastyryp, ótkizdi. Oǵan jetekshi qazaqstandyq jáne sheteldik shyǵarmashylyq uıymdary, mádenıet jáne sport sheberleri, sondaı-aq, Qazaqstannyń daryndy jastary qatysty», — dedi A. Raıymqulova.
Sonymen qatar kórme aıasynda elimizdiń aımaqtarynda da 31 myńnan astam shara ótkizildi, elordamyzda barlyq oblystardyń jáne Almaty men Astana qalalarynyń Mádenıet kúnderi uıymdastyryldy.
QR Ulttyq mýzeıi kólemdi ekspozısıalar men mazmuny jaǵynan biregeı kórmeler ótkizdi. Egıpet tarapy esebinen Ejelgi Egıpettiń arheologıalyq muralary qoıylǵan halyqaralyq kórme uıymdastyryldy. Islam óneri mýzeıiniń (Egıpet, Kaır q.) jınaqtarynan «Sultan Beıbarys jáne onyń dáýiri» halyqaralyq kórmesi ótkizildi. Alǵash ret elimizde «Imperator Sın Shıhýandıdiń Terakota áskeri» mýzeıiniń halyqaralyq kórmesi ótti. Sondaı-aq, Ulttyq mýzeıde Memlekettik Ermıtaj qorlarynan Qarý-jaraq óneriniń halyqaralyq kórmesi ashyldy. Barlyǵy Ekspo-2017 kezinde Ulttyq mýzeıdi 300 myńnan astam adam aralady.
Budan ózge, mańyzdy ımıjdik joba retinde qazaqstandyq jáne gollıvýd juldyzdary, «Oskar», «Altyn globýs», «Sezar» syılyqtarynyń laýreattary Nıkolas Keıdj, Edrıan Broýdı jáne Djon Malkovıchtiń qatysýymen ótken «Eýrazıa» Hİİİ halyqaralyq kınofestıvalin atap ótýge bolady.
«Bir sózben aıtsaq, E. Broýdı, Dj. Malkovıch qazirgi tańnyń ózinde belsendi baılanys ornatyp, álemge Los-Andjelestegi kórmeniń prezentasıalarynda, «Karnegı Hol» teatrynda jáne t. b. jerlerde Qazaqstannyń san qyrly mádenıetin tanystyryp júr», — dedi vıse-mınıstr.
«Astana Balet» teatrynyń, «Astana Opera» MOBT, «Qazaqstan» OKZ alańdarynda koreıalyq trýppa Universal Ballet, AQSH-tan kelgen Bad Boys of Dance, «Astana Balet» teatrynyń, «Astana Opera» MOBT balet trýppasynyń, sondaı-aq, álemdik balettiń tanymal solıseriniń qatysýymen Eurasian Dance Festival balet óneriniń halyqaralyq festıvali ótti.
«Ekspo-2017»-niń mádenı baǵdarlamasy Qazaqstan halqynyń mádenıet jáne ónerdegi jetistikterin jan-jaqty ári tolyq kólemde kórsete bildi. Keshendi baǵdarlamada qazaq halqynyń tarıhyn, mádenıetin jáne salt-dástúrin ashyp kórsetetin sharalarǵa erekshe kóńil bólindi», — dep sózin túıindedi A. Raıymqulova.
