Qazaqstandaǵy tuz shyǵaratyn kóshbasshy kásiporyn «Araltuz» AQ-nyń ónimderi Reseı, Qyrǵyzstan, Ózbekstan, Ázirbaıjan naryǵyna shyǵarylyp jatyr, dep jazady Qamshy.kz aqparat agenttigi. 

«Araltuz» AQ Birinshi vıse-prezıdentiniń kómekshisi Ǵanı Sısekeshovtiń aıtýynsha, bıyl mekemeniń qurylǵanyna 92 jyl tolyp otyrǵan kompanıa ıodtalǵan as tuzyn shyǵarady jáne onyń negizgi óndirýshisi. Aksıonerlik qoǵam sapaly taýar shyǵarý boıynsha kóptegen halyqaralyq jáne respýblıkalyq kórmeler dıplomdarynyń ıegeri. 2001-2003 jyldary «Araltuzda» zaýyt tarıhynda birinshi ret qaıta qurý jumystary atqarylyp, óndiriske «tuzdy ekinshi ret baıytý» tehnologıasy engizilgen. Iaǵnı, tuzdy jýý, maıdalaý, ıodtaý jáne keptirý jumystary qazirgi zaman talabyna saı oryndalýda.

Al 2012 jyldan bastap «Araltuz» jańa ınvestordyń kelýine oraı, kóptegen ıgilikti jumystar jasaldy. Elbasynyń qoldaýymen júzege asqan ındýstrıalyq-ınnovasıalyq damýdyń memlekettik baǵdarlamasynyń arqasynda bıznesti damytýǵa jáne jańa bastamalardy iske asyrýǵa múmkindik týdy. Sonyń arqasynda «Araltuz» AQ as jáne tehnıkalyq tuz óndirisin ulǵaıtý» jobasyn iske qosqan.

«Jobaǵa eki jarym mıllıard teńgeniń ústinde ınvestısıa salynyp jáne dúnıe júzi boıynsha tuz óndirýge arnalǵan qural-jabdyqtyń kóshbasshysy Ispanıa («Construcciones Mecanicas J.SERRA, S.A.») kompanıasynyń qural-jabdyqtaryn aldyrdyq. Buǵan deıin zaýyt ónimdiligi jylyna 120 myń tonna bolsa, jańa zaýytty iske qosý arqyly ónimdilikti 1,7 esege ulǵaıttyq. Buryn «Araltuz» ishki naryqta as tuzynyń 70 paıyzy tıesili bolsa, jańa zaýytty iske qosý arqyly ishki naryqtaǵy úles 90 paıyzǵa deıin jetti. Sáıkesinshe, syrtqy naryqtaǵy úlesi de ulǵaıdy», - deıdi Ǵanı Sısekeshov.

«Araltuzdyń» ónimderi Qazaqstan naryǵynan ózge Reseı, Ózbekstan, Qyrǵyzstan, Ázirbaıjan elderine eksporttalýda. Sonymen qatar, Qytaı, Japonıa, Birikken Arab Ámirlikterine de jóneltýdi josparlap otyr.

Aldaǵy ýaqytta kásiporyn hımıa ónerkásibin damytý maqsatynda quny 246 mln AQSH dollaryn quraıtyn kálsılendirilgen soda jáne kir jýǵysh untaq shyǵarý jobalaryn iske qosýdy josparlap otyr.

Qyzylorda oblysyndaǵy kásipkerler palatasynyń sarapshysy Gúldana Tańatovanyń aıtýynsha, respýblıkalyq «Altyn sapa» Qyzylorda oblysy atynan «Araltuz» AQ qatysady.

«Bul kompanıanyń ónimderi jarnamaǵa muqtaj emes. Sebebi, attarynyń ózi brendke aınalǵan kompanıa ónimderin elimizdiń ǵana emes, shet eldiń turǵyndary da keńinen qoldanýda», - deıdi G.Tańatova.