Sankt-Peterbýrgte Kenesary hannyń kisesi saqtalǵany anyqtaldy, — dep habarlaıdy Qamshy.kz aqparat agenttigi. Bul týraly Berik Ábdiǵalıuly óziniń feısbýk paraqshasyna jarıalady. 

«Alash áskeri taqyrybyn zerttep júrip, Seıilbek Janaıdarovtyń 1915 jyly Sankt-Peterbýrgtegi Reseı etnografıalyq mýzeıine Kenesary hannyń kisesin tapsyrǵany týraly derek kezdestirdim. Bul jádiger «Kse – poıas kırgızskogo hana Sredneı Ordy» degen atpen atalǵan mýzeıdiń qorynda búgingi kúnge deıin saqtalǵan eken. Ony mádenıet jáne sport mınıstiri Arystanbek Muhamedıulymen Sankt-Peterbýrgtegi mýzeıge barǵanda óz kózimizben kórýge múmkinshilgi týdy.
Seıilbek Janaıdarov 1918 jyly Atbasar Alash áskerı dıvızıonyn qurǵan ári Alashorda úkimetiniń kandıdat múshesi bolǵan azamat.

Bul jádiger Seıilbek Janaıdarovtyń qolyna qalaı túskenin zertteı kele anyqtaǵanymyz – ol kiseni Seıilbektiń atasy – Kenesary hannyń áskerı qolbasshylarynyń biri Janaıdar Orynbaıulynan qalǵan mura eken. Janaıdar batyrdyń erlikteri týraly Musa Shormanovtyń, Máshhúr Júsiptiń, Doskeı aqynnyń, Jambyldyń, Imanjan Jylqaıdarulynyń estelikteri men jyrlarynda kezdesedi. Sondaı-aq, bul týraly İ.Esenberlınniń «Qahar» romanynda da jazylǵan.
Batyrdyń urpaqtarynyń aıtýynsha, Kenesary han ózin ólimnen birneshe ret qorǵap qalǵany úshin ári kórsetken erlikteri úshin atalǵan kiseni Janaıdar Orynbaıulyna tartý etken. Jalpy Kenesary óz batyrlaryna soǵysta kórsetken erlikteri úshin orden-medal ornyna alǵys retinde úlken syı-sıapat, marapattaıtyn dástúri bolǵan. Sondaı-aq Kókshetaý shaıqasynda jeńiske jetkeni jáne shynaıy erjúrektik kórsetkeni úshin Kenesary Aǵybaı batyrǵa atasy Abylaı hannan qalǵan qanjardy tartý etken eken», — dep jazdy Berik Ábdiǵalıuly. 

Sonymen birge Berik Ábdiǵalıuly bul týraly aqparatty tolyqtyratynyn aıtty.