Búgin Aqtóbede "munaı urlaýmen aınalysqan qylmystyq top" degen kúdikpen ustalǵan 26 adamnyń isi boıynsha negizgi sot prosesi bastaldy. Tergeý qorytyndysy boıynsha olarǵa aýyr jáne asa aýyr qylmystar jasaǵan degen aıyptar taǵylǵan. Sot Aqtóbe oblystyq qylmystyq ister jónindegi mamandandyrylǵan aýdanaralyq sotynda ótip jatyr. Jýrnalıser sot barysyn jeke bólmede monıtordan baqylap otyr, dep Qamshy.kz aqparat agenttigi Azattyqqa siltep jazady.
"Qylmystyq topqa jetekshilik etken" birinshi top múgedegi Erkin İzbasardy tergeý Qylmystyq kodekstiń 13 túrli baby boıynsha aıyptap otyr. Sottalýshylardyń 17-si tergeý ızolátorynda, al 9-y eshqaıda shyqpaý týraly qolhatpen bostandyqta júr. Sottalýshylar arasynda oblystyq ishki ister departamenti basshysynyń burynǵy orynbasary da bar.
Erkin İzbasar men onyń serikterine taǵylyp otyrǵan taǵy bir úlken aıyp – munaı urlyǵy. Tergeý materıaldaryna qaraǵanda, "Saǵyz Petroleým" kompanıasyna qarasty "Qaǵanaı" kenishinen 2015 jylǵy maýsym-qyrkúıek aralyǵynda 530 tonna munaı urlanǵan. Urlanǵan munaı quny 11 mıllıon 302 myń teńge ekendigi aıtylady. Odan bólek, Baıǵanın aýdanyndaǵy "Ashykól", Muǵaljar aýdanyndaǵy "Sınelnıkovskoe" kenishi men Baıǵanın aýdanyndaǵy "Qaratóbe" kenishinen de ár jyldary asa kóp mólsherde munaı urlanǵan. Ázirshe, urlanǵan munaıdyń naqty kólemi men keltirilgen shyǵyn mólsheri aıtylǵan joq.
2016 jyldyń jeltoqsanynda UQK qyzmetkerleri men korrýpsıaǵa qarsy is-qımyl ulttyq búrosy jáne ishki ister mınıstrligi birlesip Aqtóbe oblysy jáne taǵy keı oblystarda "munaı ónimderin jymqyrýmen aınalysqan" degen kúdikti topty qolǵa túsirý operasıasyn júrgizgen. Keıin sot operasıa barysynda ustalǵan jıyrmadan astam kúdiktini qamaýǵa sanksıa bergen.
UQK sonymen qatar "munaı urlaýmen aınalysqandardy qorǵashtaǵan radıkaldy salafızm baǵytyn ustanatyn qylmystyq toptyń birneshe múshesi ustalǵany" týraly da habarlaǵan.
