«Kazsınk» JSHS-niń óndirisin jańǵyrtý jalǵasýda. Jańa baıytý jáne metalýrgıa tehnologıalary óndirilgen myryshtyń árbir 1000 tonnasy úshin 600 myń AQSH dollary kóleminde paıda ákeledi. Shyǵys Qazaqstan oblysynyń ákimi Danıal Ahmetov Astanadaǵy Ortalyq komýnıkasıalar qyzmetinde 2017 jyldyń 29 qarashasynda ótken brıfıńte metalýrgıalyq óndiristi jańǵyrtý týraly málimet jasady.

Taý-ken ónerkásibi men óńdeý ónerkásibinde asa untaqtaý tehnologıalary engizilýde. Bul paıdaly mıneraldardy polımetal kenderinen óte usaq kúıinde bolsa da bólip alýǵa múmkindik beredi. Mundaı tehnologıalar óndiristik prosesterdiń qunyn 1,5-2 esege tómendetedi.

«Kazsınkte» qoldanylatyn pırometalýrgıalyq prosesterdi jańǵyrtý júrip jatyr. Jańa tehnologıalar óndiristiń energıa syıymdylyǵyn 4-8%-ǵa tómendetedi.

Bul ǵylymı-tehnıkalyq jobalar «Ekonomıkany jedeldetilgen tehnologıalyq jańǵyrtý» basymdyǵyn iske asyrý aıasynda «Kazsınktiń» D.Serikbaev atyndaǵy SHQMTÝ-dyń birlesýimen júzege asýda.

Jalpy alǵanda oblystaǵy alyp kásiporyndar («Kazsınk», «Úlbi metalýrgıa zaýyty», «Óskemen tıtan-magnıı kombınaty», «Vostoksvetmet», «Kazmınerals» korporasıasy) Serikbaev atyndaǵy SHQMTÝ-men birlese otyryp jalpy somasy 7,8 mlrd.teńgeni quraıtyn onǵa jýyq ǵylymı-tehnıkalyq jobalardy iske asyrý boıynsha jumystaryn jalǵastyrýda.