Oral qalasynyń turǵyny, 29 jastaǵy Dına Sırıaǵa nelikten ketkenin aıtyp berdi dep habarlaıdy Qamshy.kz aqparat agenttigi mgorod.kz basylymyna súıene otyryp.
Tórt balanyń anasy Dına 2011 jyly ol áleýmettik jelide bolashaq kúıeýimen tanysyp, onymen birge Pákistanǵa qashyp ketken. Sodan keıin olar Túrkıaǵa zańsyz ótip, úsh jyl sol jerde turǵan. Túrkıada eki qyzy dúnıege kelgen.
« Biz Sırıadaǵy ómir jaıly vıdeorolıkti kórdik. Vıdeoda bári jaqsy, bári sharıǵat boıynsha ómir súretini aıtyldy. 2015 jyly halıfat qurylǵany jarıalanǵan kezde biz jaqsy ómir izdep, Sırıaǵa kettik. Sırıada taǵy eki balany dúnıege ákeldim. DAISH bergen aqshaǵa kún kórdik. Alaıda kún saıyn tólenetin soma qysqaryp otyrdy», — dedi Dına.
«Otbasymyzben Sırıaǵa kelip, bos qalǵan úılerdiń birinde turdyq. Biraq Sırıada ómir bizge aıtylǵandaı jaqsy emes eken. Ondaǵylar sharıǵat zańdaryn ustanbaıdy. Bizge basynda basqa somany ýáde etip, is júzinde odan az tóledi. Onyń úsinde ár joly kólemi azaıyp otyrdy. Sońǵy ret otbasymyzǵa 30 dollar berdi. Bul aqshaǵa biz tek azyq-túlik pen alǵashqy qajettiliktegi zattardy satyp aldyq», — dedi tórt balanyń anasy.
Dınanyń aıtýynsha, vıdeorolıkterde aıtylǵan ómir shyndyqqa janaspaıdy. Otbasyny shaqyrǵan kezde, eger bir nárse unamasa, kez kelgen ýaqytta qaıtyp ketýge bolatynyn aıtypty. Biraq olaı bolmaı shyqqan.
«Ol jaqtan sizdi syrtqa shyǵarmaıdy. Qashýǵa tyrysqandardy ustap ákelip, túrmege otyrǵyzady. Qashqanyna ókinetinin aıtsa ǵana jiberedi. Olaı etpese, óltiredi. Elimizge oralýymyz kerek degen sheshimdi ózimiz qabyldadyq. Alaıda ol jaqtan jolǵa shyǵý óte qıyn boldy. Kimge senip, kómek suraryńdy bilmeısiń. Bir kúni áıelder ǵana júrýge bolatyn joldy biletin sırıalyq tabyldy. Qyrkúıekte ózge qyzdarmen birge kúrdterge baryp, olarǵa ózimiz berildik. Ol jaqtan bizdi 13 qarasha kúni Reseı Federasıasynyń Groznyı qalasyna alyp keldi. Ol jerden ata-anamnyń úıine keldim. Kúıeýim áli Sırıada júr, biraq ol áskerı urystarǵa qatyspaǵan. Sırıada er adamdarǵa ketý qaýipti. Eger sodyrlar otbasy qashyp ketkenin bilse, ony óltiredi», — deıdi Dına.
Dına tórt balasymen birge ata-anasymen turyp jatyr. Dına balalaryn balabaqsha men mektepke berý úshin olarǵa qujat jasatpaqshy.
