Qazaqstan men Qytaıdyń shekara boıyndaǵy yntymaqtastyǵy jónindegi kezdesýde sóz sóılegen Almaty oblysynyń prokýrory Azamat Jylqybaev Qytaı tarapy "Qorǵas" shekara boıy yntymaqtastyǵy halyqaralyq ortalyǵyndaǵy (SHYHO) óz aýmaǵyna saqaldy jáne musylmansha kıingen adamdardy kirgizbeı jatqanyn málimdedi, dep habarlaıdy Qamshy.kz aqparat agenttigi Sputnik Qazaqstanǵa silteme jasap.
Onyń aıtýynsha, "Qorǵas" SHYHO arnaıy kólik-jaıaý júrginshi jolynda sáýirden bastap Qytaı áskerı bólimderi qyzmet kórsetetin qosymsha baqylaý-tekserý ótkizý pýnktteri ornatylǵan. Bul shara dinı ekstremızm men halyqaralyq terorızmge qarsy áreket etý maqsatynda Shyńjań-Uıǵyr avtonomdy aýdany bıliginiń sheshimimen qabyldanǵan.
"Sonymen birge, atalǵan pýnktterde ortalyqtyń qytaı tarapyna ulty men azamattyǵyna qaramastan saqal qoıǵan jáne musylman turmys-saltyna saı kıingen adamdardy ótkizbeı jatyr. Bul Qazaqstan azamattary úshin de, bizdiń aýmaqtan sonda ótkisi keletin shetel azamattary úshin de ortalyqqa barýdy qıyndatyp jatyr, ekinshiden, eki memleket arasyndaǵy taýar aınalymy tómendedi", — dedi prokýror.
Ol áskerı ótkizý pýnktteriniń jumysyn "Qorǵas" SHYHO qyzmetin retteý týraly talaptar men kelisimderge sáıkes keltirýdi usyndy. Kelisim boıynsha, mundaı qyzmetti tek tabıǵat apaty, epıdemıa, tótenshe jaǵdaılar týyndaǵan kezde qoldaný qarastyrylǵan.
Bul aqparatty Qazaqstan bas prokýrorynyń orynbasary Andreı Lýkın de rastady.
Al, Qytaı joǵary halyqtyq prokýratýrasynyń ókili Go Sınvan bul problema týraly alǵash ret estip turǵanyn, sondyqtan osyndaı usaq máselelerdi sheshý úshin eki el ókilderi arasynda turaqty kezdesý ótkizip turý qajet ekenin atap ótti.
