Qazirgi ýaqytta Qazaqstan úkimeti qazaqstandyq ǵaryshkerdi ǵaryshqa ushyrý máselesin qarastyryp jatqan joq. Bul týraly QR Qorǵanys jáne aeroǵarysh ónerkásibi mınıstrliginiń aeroǵarysh komıteti málim etti, dep habarlaıdy Qamshy.kz aqparat agenttigi  Sputnik Qazaqstan málimetine súıenip. 

"QR QAÓM Aeroǵarysh komıteti 6 jeltoqsanda birqatar aýdandyq jáne respýblıkalyq BAQ-tarda shyqqan reseılik ǵaryshtyq keme ekıpajynyń quramynda qazaqstandyq ǵaryshkerdiń ushý múmkindigi týraly aqparatty tolyqtaı durys dep aıtýǵa bolmaıdy. Naqty aıtqanda, Aqtóbe planetarııiniń 50 jyldyǵynda Qazaqstannyń Halyq Qaharmany, ushqysh-ǵaryshker Aıdyn Aıymbetovtyń suhbat barysynda atalǵan másele boıynsha aıtylǵan sózi durys túsindirilmegen", — dep málim etti aeroǵarysh komıteti.  

Komıtet habarlaǵandaı, qazirgi ýaqytta Qazaqstan úkimeti qazaqstandyq ǵaryshkerdi ǵaryshqa ushyrý máselesin qarastyryp jatqan joq. 

"Zamanaýı kosmonavtıka bul, eń aldymen, jańa bilim, tehnıkalyq progres jáne adamzattyń bolashaǵy. Sondyqtan bolashaqta Qazaqstan Respýblıkasy, árıne, ǵaryshtyq zertteýler júrgizýge qajettilik týyndaǵanda basqarylatyn kosmonavtıkany damytýdy josparlap otyr", — de atap ótti komıtettegiler. 

Esterińizge sala ketsek, keshe buqaralyq aqparat quraldarynda taǵy bir qazaqstandyq ǵaryshqa ushady degen aqparat taraǵan edi. 

"Reseı qazir ǵarysh kemesin daıyndap jatyr, ol 6 oryndy bolýy múmkin, ekıpaj quramynda qazaqstandyq ǵaryshker bolady. Kadr tabylady, bizde bul qadamǵa daıyn mamandar kóp ", — degen Aıdyn Aıymbetovtyń sózin keltirgen edi BAQ.  

Qazirgi ýaqytta Aıdyn Aıymbetov "Qazaqstan Ǵarysh Sapary" Ulttyq kompanıa" AQ vıse-prezıdenti laýazymynda. Bul kompanıa jerdi qashyqtyqtan zondtaý ǵaryshtyq júıesi jáne dáldigi joǵary spýtnıktik navıgasıa júıesiniń ulttyq operatory bolyp tabylady.