Almatyda terorızmdi nasıhattaǵany úshin ustalǵandar polıseıler men sheneýnikterge shabýyl jasaýdy josparlaǵan, dep habarlaıdy Qamshy.kz aqparat agenttigi Sputnik Qazaqstan saıtyna silteme jasaı otyryp.
Almaty polısıasy QR QK 256-baby boıynsha (terorızmdi nasıhattaý nemese terorızm aktisin jasaýǵa jarıa túrde shaqyrý) Jumaǵulov, Ómirov, Ábishevke qatysty qylmystyq isti tergep jatyr. Sot sanksıasymen olar 2 aıǵa tergeý ızolátoryna qamaldy.
"Tergeý barysynda Jumaǵulov bastaǵan kúdiktiler quqyq qorǵaý men memlekettik qurylym ókilderine qarsy kúsh kórsetý aksıalaryn josparlaǵany anyqtaldy», — dedi Almaty İİD resmı ókili Saltanat Ázirbek.
Polıseılerdiń aqparatynsha, Jumaǵulov kásipkerlerden aqsha bopsalaý úshin qylmystyq top quryp, Qyrǵyzstannan qarý satyp alýdy josparlaǵan. Sondaı-aq ol polıseılerge ustalǵan jaǵdaıda, bar kináni óz moınyna alatyn adamdardy da izdegen.
"Aqsha bopsalaǵannan keıin Jumaǵulov quqyq qorǵaý organdarynyń qyzmetkerlerine qarsy belsendi is-áreketke kóshýdi josparlaǵan. Eshkimge syr bildirmeý úshin uıaly telefondar men SIM-kartalar satyp almaqshy bolǵan», — dep naqtylady polısıadaǵylar.
Esterińizge salyp ótsek, qarasha aıynyń sońynda terorızmdi nasıhattady degen kúdikpen bir top qazaqstandyq ustalǵan bolatyn. Kóp uzamaı toptyń úsh lıderi – Shyǵys Qazaqstan, Almaty jáne Jambyl oblysynyń týmalaryn qamaýǵa alýǵa sanksıa berildi. Polıseıler BAQ-ta kúdiktilerdiń qarýly jıhadqa shaqyrǵan beıneúndeýin jarıalady.
