Almatyda Qoǵamdyq keńes otyrysynda qalanyń týrısik damýy talqylanyp, Kókjaılaý jobasy týraly aıtyldy.

Qalalyq Týrızm jáne syrtqy baılanys basqarmasynyń basshysy Erlan Jaılaýbaı qazirgi tańda jobanyń jańa tehnıkalyq-ekonomıkalyq negizdemesi jasalyp jatqanyn aıtty.

Jańa qujatty qabyldaý kezinde tabıǵı klımattyq ózgeshelikter eskeriledi.

«Osynyń aldynda Kókjaılaý jobasy bolǵan edi. Ony toqtatyp qoıdyq. Qazirgi tańda tehnıkalyq-ekonomıkalyq negizdemege ózgeris engizilip, bylaısha aıtqanda jańa negizdeme jasalyp jatyr. Iaǵnı, biz aldynda josparlanǵandaı, 200 myń sharshy metrlik qurylys nysanyn salmaıtyn boldyq. Úlken tas joldary da bolmaıdy, ol úshin kóp jasyl-jelekti kesýge týra keletin edi. Jańa qujattaǵy jol jobasy úshin 8 myń taldy kesý kózdelgen. Qazirgi jobada bul máselelerdiń bári eskerilgen. Biz jyl boıy týrıs qabyldaı alatyn keshen jasaýǵa bet buryp otyrmyz. Bul VIP-kýrort emes jalpy qalalyqtarǵa qoljetimdi keshen bolady. Mundaı keshenniń qurylysy qalanyń ekologıasyn jaqsartýǵa septigin tıgizbek. Joba jumysy bitken soń halyqaralyq sarapshylardyń baǵalaýyna usynamyz», - dedi ol.

Keńeske qatysýshylar almatylyqtardyń arasynda bul másele daýly bolyp otyrǵan, sondyqtan, Kókjaılaý qurylysyn qoǵamdyq talqylaýdan mindetti túrde ótkizý kerek ekendigi aıtyldy.  

«Men - almatylyqpyn. Taýlardy jaqsy kóremin. Eski negizdemede qoǵamdy qulaqtandyrý máselesinde naqty reglamentasıa bolǵan joq.  Qazir jaǵdaı ózgerdi. Orhýs konvensıasymen úndesetin ekologıalyq kodeks jumys jasap tur. Jańa negizdeme shyqqan soń ár kezeńdi talqylaýǵa shyǵaratynymyzdy senimmen aıta alamyn», - dedi Erlan Jaılaýbaı.

Onyń aıtýynsha, osy maqsatta 200 mln teńge bólingen. Al jańa jobany júzege asyrýǵa ınvestor izdestirilip jatyr.
Aıta keter bolsaq, atalmysh jobaǵa qatysty Almaty qalasynyń ákimi Baýyrjan Baıbek «Taý shańǵysy týrızmi ekonomıkalyq turǵydan jaǵajaı týrızminen 5 ese kóp mýltıplıkatıvtik bolyp sanalady», - dep aıtqan bolatyn.

Qala basshysynyń aıtýynsha, týrızm «qosymsha jumys oryndary jáne servıstik baǵdarlanǵan ekonomıka» bolyp tabylady. Týrızmdi damytý úshin taza aýa kerek, qazir sol baǵytta jumystar istelip jatqandyǵy belgili boldy.

Qazgıdromettiń aıtýynsha, Almatydaǵy aýanyń lastaný deńgeıi 20% -ǵa tómendedi. Turaqty qoǵamdyq kólikti qurý, ınfraqurylymdy jańǵyrtýmen qatar, qalany barynsha jaqsy, ádemi etedi jáne barynsha kóp týrıserdi tartady