Nursultan Nazarbaev dańǵyly, Saǵadat Nurmaǵambetov, Talǵat Bıgeldınov, Roza Baǵlanova atyndaǵy kóshelerdiń taqtalaryn ózgertý 16 jeltoqsanǵa belgilendi.
Qalalyq máslıhat depýtattary Murat Ádilhanov, Vácheslav Banshıkov, Vladıslav Lı bıznestiń áleýmettik jaýapkershiligi aıasynda birqatar kóshelerdiń taqtalaryn ózgertý týraly bastama kóterdi.
«Memleket basshysynyń arqasynda biz barlyǵymyz Qazaqstanda beıbitshilik pen kelisim jaǵdaıynda ómir súrip jatyrmyz. Bolashaqqa jospar quryp, árkimniń óz isin ashýǵa, bıznesin jasaýǵa barlyq jaǵdaılar jasalǵan. Onyń ústine, Nursultan Nazarbaev dańǵyly - Almatydaǵy basty kóshelerdiń biri, sondyqtan biz kóshe taqtalaryn jańartý jumystaryna atsalyssaq deımiz», - dedi máslıhat depýtaty, bıznesmen, mesenat Vácheslav Banshıkov.
Atap aıtqanda, QR Táýelsizdigi kúni Nursultan Nazarbaev dańǵylyndaǵy 160 úı men 33 zańdy uıymnyń taqtalary aýystyrylady. Saǵadat Nurmaǵambetov atyndaǵy kóshede 115 turǵyn úı men 11 zańdy uıym taqtalary ózgeredi. Roza Baǵlanova atyndaǵy kóshede 136 turǵyn úıdiń taqtasy jańarady. Talǵat Bıgeldınov atyndaǵy kóshede 24 úıdiń taqtasy aýystyrylady.
«Kóshe taqtalaryn ózgertý respýblıkalyq, oblystyq, aýdandyq máni bar qalalar, astana, aýyl jáne basqa da eldi mekender rásimdeýdiń biryńǵaı standarty boıynsha júzege asyrylady», - dedi Almaty qalasynyń Tilderdi damytý basqarmasynan.
Aıta keter bolsaq, Almatyda Nursultan Nazarbaev dańǵylynda alǵashqy jol nusqaýlyqtary paıda bolǵan edi. Jol nusqaýlyqtary Fýrmanov kóshesin aýystyrǵan kúnniń ertesinde birden qoıylǵan.
Fýrmanov kóshesi 30 qarasha kúni máslıhat depýtattarynyń sheshimimen Nursultan Nazarbaev dańǵylyna aýystyrylǵan bolatyn.
Almaty qalasy ákimdiginiń baspasóz qyzmeti júzege asyrylyp jatqan «Almaty Smart City» tujyrymdamasynyń jańa nusqaýlyqtarǵa qala búdjetinen bir teńge de jumsalmaǵanyn jetkizdi.
Aıta keteıik, tujyrymdama «Billboard Video Digital Broadcast» kompanıasynyń ıntellektýaldy-aqparattyq navıgasıalyq kólik júıesi jobasyna tıesili. Joba joǵary sapaly LED-dıspleımen, bort kompúterlermen, jol apatyn bildiretin, aýa raıyn, kýrs baǵamyn habarlaıtyn navıgasıalyq habarlaǵyshtarmen qamtylǵan jol boıyndaǵy mettaloqurylǵylardyń aqparattyq-tehnıkalyq kesheninen turady.
Qazirgi ýaqytta Almatyda dál osyndaı 44 medıabord jáne jańa alańda bir «Jumbo» megabordy jumys istep tur. Sondaı-aq, Medeý aýdandyq Halyqqa qyzmet kórsetý ortalyǵynda «aqyldy HQO» pılottyq jobasy iske qosyldy.
Kompanıa aldaǵy ýaqytta «aqyldy qala» jobasyn Astana men Aqtaý qalalarynda, Almatydaǵy jaıaý júrginshiler, avtoturaq aımaqtary men Saýda ortalyqtarynda jáne Qazaqstannyń ózge qalalaryndaǵy HQO-nyń In-door júılerine engizbek.
Aıta keterligi, qazaqstandyq «Smart-City» eko-júıesin atalǵan kompanıa Qytaı, Sıngapýr, BAÁ, Reseıge engizý týraly kelisimshartqa qol jetkizgen.
