Búgin Qazaqstan Respýblıkasynyń Úkimeti taǵaıyndaǵan «Daryn» memlekettik jastar syılyǵynyń laýreattaryn saltanatty túrde marapattaý rásimi ótti, dep habarlaıdy Qamshy.kz aqparat agenttigi QazAqparatqa silteme jasaı otyryp.
«Elbasy aıtqandaı daryndy jastar - ol elimizdiń bolashaǵy jáne áleýeti. Jastar máselesi, saıasaty, olardy jumys oryndarymen qamtamasyz etý, jastardyń áleýetin ashý, talantyn kórsetýge múmkinshilik jasaý árqashan da Elbasynyń jáne el Úkimetiniń nazarynda. «Daryn» syılyǵy buryn eki jylda bir ret berilgen bolsa, bıylǵy jyldan bastap jyl saıyn beriletin bolady. Ol da barlyǵymyzdyń ortaq jetistigimiz dep oılaımyn. Onyń ústine ol memlekettiń jáne Úkimettiń jastarǵa nazar aýdarýynyń kórinisi», - dedi syılyq ıelerin marapattaý rásiminde Qazaqstan Respýblıkasy Din isteri jáne azamattyq qoǵam mınıstri Nurlan Ermekbaev.
Syılyq 10 nomınasıa boıynsha - ádebıet, ǵylym, beıneleý óneri, jýrnalısıka, klasıkalyq mýzyka, qoǵamdyq qyzmet, sport, teatr jáne kıno, estradalyq óner, halyq shyǵarmashylyǵy salasynda úzdik dep tanylǵan jastarǵa tabystaldy. Osylaısha, «Sport» nomınasıasy boıynsha qazaqstandyq mánerlep syrǵanaýshy Denıs Ten jáne áıelder arasyndaǵy halyqaralyq grosmeıster, tórt dúrkin álem chempıony Dınara Sádýaqasova jeńimpaz dep tanyldy.
«Estrada» nomınasıasy boıynsha qazaq estradasynyń ánshisi Serik Ibragımov pen Qazaq ulttyq óner ýnıversıtetiniń stýdenti Rústem Jýginisov marapatqa ıe boldy. «Klasıkalyq mýzyka» nomınasıasy boıynsha «Young Eurasian Soloists» kameralyq orkestriniń solısi Shernıaz Musahan men «Astana Opera» Ulttyq opera jáne balet teatrynyń ánshisi Marıa Mýdrák «Daryn» syılyǵyn ıelendi. «Halyq shyǵarmashylyǵy» nomınasıa boıynsha aıtysker aqyn Syrym Áýezhan jáne Qazaq ulttyq óner ýnıversıtetiniń oqytýshysy Dáýlethan Sartaı marapattaldy.
«Ádebıet» nomınasıasynda aqyn Dınara Málikova, «Aq jol» demokratıalyq partıasynyń ıdeologıalyq jumysy bóliminiń keńesshisi Eldos Toqtarbaevtyń eńbegi úzdik dep tanyldy. «Teatr jáne kıno» nomınasıasy boıynsha G.Músirepov atyndaǵy qazaq memlekettik akademıalyq balalar men jasóspirimder teatrynyń aktrısasy Dınara Abdýllına jáne «Astana Opera» memlekettik opera jáne balet teatrynyń balet trýppasynyń jetekshi solısi Baqtıar Adamjan «Daryn» syılyǵynyń laýreattary atandy. «Jýrnalısıka» nomınasıasy boıynsha Atameken Business Channel arnasynyń «Basty taqyryp» baǵdarlamasynyń júrgizýshisi Erbolat Muhamedjanov jáne «Respýblıkalyq radıo» JSHS jańalyqtar qyzmetiniń redaktor-júrgizýshisi Álibek Ábdilov jeńis tuǵyrynan kórine bildi. «Dızaın jáne beıneleý óneri» nomınasıasy boıynsha «Daryn» syılyǵy Qazaq ulttyq óner ýnıversıtetiniń stýdenti Nurbolat Asqar men Abaı atyndaǵy Jambyl gýmanıtarlyq kolejiniń oqytýshysy, ári oń qolynan óner tamǵan zerger Halıev Berik Jumaǵalıulyna berildi.
«Qoǵamdyq qyzmet» nomınasıasy boıynsha «Daryn» syılyǵy «Jas Otan» jastar qanatynyń hatshylyǵynyń basshysy Dáýlet Káribekke jáne Atyraý oblysyndaǵy «Qazaqstan-2050» jalpyulttyq qozǵalysynyń uıymdastyrýshysy Ilıas Qonysbaevqa tabystaldy. «Ǵylym» nomınasıasy boıynsha Qorqyt Ata atyndaǵy Qyzylorda memlekettik ýnıversıtetiniń jetekshi mamany Nurǵalı Aqylbekov, sondaı-aq L.N.Gýmılev atyndaǵy EUÝ-niń ǵylymı toby -Ilá Korolkova jáne Dmıtrıa Shlımas úzdik dep tanyldy. Barlyq jeńimpazdarǵa Qazaqstan Respýblıkasy Úkimetiniń qaýlysymen «2017 jylǵy Daryn memlekettik jastar syılyǵynyń laýreaty» ataǵy berildi, jáne olar dıplommen, tósbelgimen jáne aqshalaı syılyqtarmen marapattaldy.
QR Din isteri jáne azamattyq qoǵam mınıstrligi uıymdastyrǵan shara aǵymdaǵy jyly Astana qalasynyń 20 jyldyq mereıtoıyna oraı ótkizilip otyr. Saltanatty shara rásimine Qazaqstan Respýblıkasy Din isteri jáne azamattyq qoǵam mınıstri N.Ermekbaev, Qazaqstan Respýblıkasy Parlamenti Májilisiniń depýtattary, memlekettik uıymdardyń, azamattyq sektordyń, buqaralyq aqparat quraldarynyń, mádenıet jáne óner qaıratkerleriniń ókilderi qatysty. Komısıa sheshimimen syılyq alý úshin 213 úmitkerlerdiń ishinen 21 úmitker qoldaý tapty, onyń ishinde 2 adamnan quralǵan 1 ǵylymı top bar. Ótken jyldarmen salystyrǵanda syılyq alýǵa úmitkerlerdiń sany eki ese artqanyn atap ótý kerek. 2017 jyldan bastap Qazaqstan Respýblıkasynyń Din isteri jáne azamattyq qoǵam mınıstrliginiń bastamasy boıynsha jyl saıyn «Daryn» syılyǵy usyný týraly sheshim qabyldanǵanyn atap ótken jón.
Endi kezekti «Daryn» syılyǵyna ótinishter qabyldaý naýqany keler jyldyń sáýir aıynan bastaý alady.
