Bratıslavada Táýelsizdik kúnine arnalǵan jáne Qazaqstan men Slovakıa arasyndaǵy dıplomatıalyq qatynastardyń 25 jyldyǵyna oraı gala-konsert jáne Kazakhstan Fashion Week Astana qazaqstandyq sán ındýstrıasynyń kórsetilimi bolyp ótti, dep habarlaıdy Qamshy.kz aqparat agenttigi Syrtqy ister mınıstrliginiń baspasóz qyzmetine silteme jasaı otyryp.
Atalǵan is-sharaǵa 400 adam, sonyń ishinde Slovakıa eks-prezıdenti Ivan Gashparovıch, Prezıdenti Ákimshiliginiń, Úkimetiniń, Parlamentiniń, iskerlik jáne mádenı-qoǵamdyq toptarynyń ókilderi, sondaı-aq sheteldik dıplomatıalyq ókildikterdiń basshylary qatysty. Óz sózinde elshi Serjan Ábdikárimov Prezıdent Nursultan Nazarbaevtyń basshylyǵymen osy jyly bılik ókilettikterin qaıta bólý týraly konstıtýsıalyq reformanyń, Úshinshi ekonomıkalyq jańǵyrýdyń bastalýynyń jáne Rýhanı jańarýdyń arqasynda jetildirilgen Qazaqstannyń ınstıtýsıonaldyq saıası jáne áleýmettik-ekonomıkalyq reformalardy iske asyrýdaǵy tanylǵan kóshbasshylyǵyn atap ótti.
Syrtqy saıasatta dıplomat Qazaqstannyń baılanystyrýshy eýrazıalyq qurlyqaralyq kópir retindegi mańyzdylyǵyn, sonymen qatar jahandyq ıadrolyq qarýsyzdaný men ony taratpaý úderisindegi, Sırıa jáne basqa da janjaldy jaǵdaılar boıynsha kelissózderdegi jetistigin atap ótti. S. Ábdikárimov qazirgi tańda joǵary deńgeıge jetken qazaqstandyq-slovak saıası, saýda-ekonomıkalyq jáne mádenı-gýmanıtarlyq qatynastarynyń 25 jyldyq damýyn da sıpattap berdi.
Sonymen birge, Astanada «Bolashaq energıasy» taqyrybyndaǵy «EKSPO-2017» halyqaralyq kórmesiniń oıdaǵydaı ótkizilýi jáne Slovakıanyń oǵan qatysýy slovakıalyq jáne qazaqstandyq kompanıalar arasyndaǵy ınvestısıalyq, ınovasıalyq jáne saýda-ekonomıkalyq baılanystardyń jandanýyna jańa serpin berdi. Slovakıanyń Úkimeti atynan Qarjy mınıstriniń orynbasary Dana Mıger halqymyzdy Táýelsizdik kúnimen quttyqtap, Qazaqstannyń Ortalyq Azıadaǵy jáne eýrazıalyq keńistiktegi mańyzdylyǵyn basa aıtty. Elimizdiń odan ári jańǵyrý josparlaryna qoldaý bildirip, keleshekte resmı Astanamen jan-jaqty baılanystardy nyǵaıtýǵa daıyn ekenin rastady.
Resmı bólimnen keıin «Jahandyq álemdegi zamanaýı qazaqstandyq mádenıet» jobasyn iske asyrý sheńberinde gala-konsert jáne Ortalyq Azıadaǵy eń úlken «Kazakhstan Fashion Week Astana» sán aptalyǵynyń modelder jınaǵynyń kórsetilimi bolyp ótti. Konserttik baǵdarlama Abzal Aryqbaev pen Anar Qasymovanyń «Arkaım» atty neo-etno-folklorlyq dýetynyń qazaqtyń kóne emýzykalyq aspaptary - dombyra, shańqobyz, sazsyrnaıda oryndaǵan týyndylardan bastaldy.
Sondaı-aq, A. Qasymova halyq ánderin oryndap, óziniń kómeımen án aıtý ónerin ortaǵa saldy. Klasıkalyq jáne estradalyq mýzykalyq Olımptiń qazaqstandyq juldyzy, Monte-Karlodaǵy 28-shi halyqaralyq festıvaldiń birinshi skrıpkasy Jámılá Serkebaevanyń jarqyn jáne harızmatıkalyq óner kórsetýi qonaqtar úshin taǵy da bir ádemi tosyn syı boldy. Ártis asqan sheberlikpen qazaq jáne eýropalyq tanymal áýenderdi oryndady. Ulttyq stılde jumys isteıtin dızaınerler «Quraq kórpe», «Samıdel» jáne «Aıda Kaýmenova»-nyń qazaq halqynyń mádenıeti men dástúrlerin pash etetin jınaqtary kórermenderdiń qoshemetterine ıe boldy. Kórsetilimniń aıaqtalysymen qonaqtar kórmege qatysyp, pret-a-porte sheberlerimen jáne manekenshilermen tildesip, Qazaqstannyń joǵary sán álemimen tanysýǵa jáne qazaq ulttyq taǵamdarynan dám tatýǵa múmkindik aldy.
