Iá, keshegi kún "Elim!", — dep shyn emirener bir qaýym eldiń taǵylym úıinde bas qosqan kúni boldy. Osydan 80 jyl buryn ult ustazy, kósemi Ahmet Baıtursynulynyń jazyqsyz, naqaqtan atylǵan
azaly kúni edi. Qazaq jurtynyń, keleshek urpaǵynyń ózgege qyzyqpaı, óz jurtynyń tarıhyna úńilse eken degen erlik isteri men arman-tilekteri úshin "halyq jaýy" atanǵan ult janashyrlarymyzdyń rýhyna arnap quran baǵyshtaýdy boryshymyz retinde sanadyq.

Osy oraıda Ál-Farabı atyndaǵy Qazaq ulttyq ýnıversıteti Fılologıa jáne álem tilderi fakúlteti, «Lıngvoarna» ǵylymı-zertteý jáne oqý ádistemelik ortalyǵy, «Aıarý» rýhanı-tanymdyq qyzdar ortalyǵy jáne Ahmet Baıtursynuly mýzeı-úıiniń qoldaýymen «Alash murasy: jastar kózimen» atty is-shara ótti.

Sonymen birge qurban bolǵan Alash Arystarynyń rýhyna arnalǵan túski as berilip, quran oqytyldy. QazUÝ, QazUTÝ jáne AÝ stýdentteri arasynda tanymdyq baıandamalar men óleńder oqylyp, bir-birimen oı bólisti. Shara barysynda oı salarlyq, taǵylymdy sózder aıtqan torǵaılyq Qaıdar Baıdebekuly men Ál-Farabı atyndaǵy Qazaq ulttyq ýnıversıtetiniń Fılologıa fakúltetiniń aǵa oqytýshysy Shortanbev Shoqan aǵaıymyz stýdentterdiń Alash murasyna qyzyǵýshylyǵyn arttyra tústi. Ahmet Baıtursynulynyń jıen nemeresi Aıman Baısalova apamyzdyń kelýi de jastardy qýantty.

Arystardyń rýhyna berilgen astyń ótýine sebepker Alashtyń shyn janashyry Raıhan Sahybekqyzy men Ǵanı Smahanulynyń ıgilikti isteri eńbektegen jas pen eńkeıgen kárige deıin úlgi alarlyq bastama. Stýdentter arasynda oı-pikir bólisý aıaqtalǵannan soń, astyń bastamasy retinde Ortalyq meshittiń ımamy Azamat Aıtmuhametuly Kóshkinbaev quran oqydy.

Sonymen qatar, quran baǵyshtap, qol jaıýdy paryz dep bilip, jastarǵa taǵylymdy sózderimen oı salǵan qonaqtarymyz Shalqar radıosynan Baqyt Jaǵypar, aqyn Serik Qalıev, tarıhshy-ǵalym Nurdáýlet Mankeevtiń aıtqan jigerli sózderi jan azyǵyn molaıta tústi. 

Esiginiń aldyndaǵy ıtine deıin jamandaǵan adamdy jaý kórip, betten alyp, tóske shabar qazaqtyń qany bar keıbir "bedeldilerdiń" bul kúndi elemek túgili, esterine alýǵa "qyrýar mańyzdy jumystarynan" qoldary tımeı júrgendigi bizdiń janymyzǵa batady. Óli rıza bolmaı, tiri baıymas. Ótkenimizdi umytsaq, keleshigimizdiń de basymyzǵa sondaı kúıdi salyp bermesine kim kepil?! Alash Arystarynyń erlikterin Aıǵa tanytpasaq ta, Jerge taptatpaıyq, baýyrlar!

QazUÝ Fılologıa jáne álem tilderi fakúltetiniń
3-kýrs stýdenti Sman Jansaıa