Kókshetaý qalasynda mádenıet jáne tilderdi damytý bóliminiń uıymdastyrýymen Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń «Rýhanı qazyna» kishi baǵdarlamasyn iske asyrý aıasynda aımaqtyq aqyndar aıtysy ótti, dep habarlaıdy Qamshy.kz aqparat agenttigi Aqmola oblysy ishki saıasat basqarmasynyń Óńirlik komýnıkasıalar qyzmetine silteme jasap.

Aıtysqa Kókshetaý, Astana, Aqtóbe, Petropavl, Qostanaı, Qaraǵandy jáne Semeı qalalarynyń jas aqyndary qatysyp, el aldynda baq synaǵan.

İs-shara «Qazaqstan Respýblıkasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasyn» júzege asyrý, sondaı-aq qazaq halqynyń aýyzeki ónerin damyta otyra, jańa sýyryp salma aqyndardy anyqtaý, jas aqyndardyń shyǵarmashylyq bastamasyna qoldaý kórsetý maqsatynda ótkizildi.

Aıta ketken jón, aqyndar «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan «HHİ ǵasyrdaǵy ulttyq sana týraly» baǵyttary, ulttyq kod, ulttyq mádenıet, «100 jańa esim» máselelerin qozǵap, el úshin eńbek etken tarıhı tulǵalardyń ómiri men erlikteri jaıly taqyryptardy ortaǵa saldy.

Mádenı sharanyń demeýshileri «AP-Impeks» JSHS-nyń dırektory Jumabaı Amırjanov pen «Zelenstroı» JSHS-nyń dırektory Gennadıı Osınenko. Al júrgizýshisi – belgili aıtysker-aqyn Arman Berdalın boldy.

Qazylar alqasynyń sheshimi boıynsha bas júldeni Qaraǵandy qalasynan Botakóz Muhıden alsa, İ oryn Petropavldan kelgen Maqsat Serikke tıesili boldy. Al İİ oryndy aqtóbelik Nartaı Tileýqul men kókshetaýlyq aıtysker Muhamed Qonqaev enshilegen. Qostanaılyq Nursultan Qasym men qyzylordalyq Tórehan Sovet İİİ oryndy ózara bólisip alǵan.

Sonymen qatar, belsendi qatysqany úshin Kókshetaý qalasynan Nurıslam Ábdil men elordadan kelgen aqyn Ardakereı Káp alǵys hattarmen marapattaldy.