Májiliste ótken Úkimet saǵatynda depýtattar aldynda sóz sóılep, ártisterge beriletin ataqtyń satylanýyn qaıtarý jóninde usynys jasaǵan Mádenıet jáne sport mınıstri Arystanbek Muhamedıulynyń sózi kópshilik arasynda qyzý talqyǵa túsken bolatyn, dep Qamshy.kz aqparat agenttigi jazady.
Osy oraıda, «Astana múzıkl» teatrynyń ujymy mınıstrdiń málimdemesine qatysty pikir bildirdi.
«Ótken aptadan bastap mádenıet pen óner salasyna jaqyndar Parlamenttegi mádenıet jáne sport mınıstriniń sóılegen sózderin talqylaýda. Osy máselege qatysty pikirimizdi biz, «Astana Múzıkl» teatrynyń ártisteri Eýropanyń tórinen jazyp otyrmyz.
Biz Mádenıet jáne sport mınıstrligi júzege asyryp otyrǵan «Rýhanı jańǵyrý» baǵdarlamasy aıasynda qazaq mádenıeti men ónerin eýropalyqtarǵa pash etýdemiz. Eýropanyń mádenı astanasy Parıj qalasynyń «Le Trianon», «Varietes» sıaqty álemge áıgili sahnalarynda ónerimizdi kórsettik. Eýropanyń júregi sanalatyn Brússel qalasynda talǵampaz Belgıa kórermenderin tuńǵysh ret qazaqtyń teatr ónerimen tanystyrdyq.
— Qamshy AA (@qamshy) December 11, 2017
Aıtaıyn degenimiz - biz sekildi shyǵarmashyl jastarǵa osyndaı deńgeıdegi múmkindik qashan berilip edi?! Mádenıetke degen jańashyrlyq osy emes pe? Mınıstrdiń sózi aıaǵyna deıin tyńdalmaı, máni men maǵynasyn ózgertilip talqylanyp jatqandyǵy bárimizge aıan» - delingen hatta.
Mádenıet pen óner salasynyń eńbekaqysy týraly másele kóterilgen eken. Mınıstr Arystanbek Muxamedıulynyń bizdiń tek jastardan quralǵan «Astana Múzıkl» teatrynyń eńbekaqy máselesin naqty bizdiń paıdamyzǵa sheship bergenin ashyp aıtqymyz keledi. Kózi qaraqty oqyrmanǵa belgili jaıt. 2016 jyldyń 1 qańtarynan bastap jańa «Eńbek kodeksi» zańdy kúshine engen edi. «Astana Múzıkl» sol jańa «Eńbek týraly zań» qabyldanǵannan keıin qurylǵany - teatrymyzdyń óte tómen deńgeıde eńbekaqy alýyna soqtyrdy. Teatrǵa «respýblıkalyq» statýs bergizip, 2018 jyldyń 1 qańtarynan bastap eńbekaqy deńgeıin kóterip berdi. Teatr ártisterimen kezdesken kezde, mınıstr jastardyń jan aıqaıy men ótinishin jazbasha qabyldap, ádilet mınıstrligi men eńbek jáne xalyqty áleýmettik qorǵaý mınıstrligine teatrymyzdyń ózekti máselesin sheshýge tikeleı ózi at salysty. Keıin respýblıkalyq búdjettik komısıa otyrysynda qorǵap shyqty. Endeshe, mádenıet mınıstriniń óner adamdaryn qoldaýy naqty istermen dáleldenip jatqandyǵy mańyzdy ekendigin aıtqymyz keledi.
Eńbekaqy máselesin bylaı qoıǵanda, kásibı mýzykant retinde «Qyzjibek» operasynyń sımfonıalyq orkestrden etno-folkloryq ansámblge laıyqtap jazyp, óziniń ulttyq mýzykalyq bastaýyna qaıtadan oraltyp, nátıjesinde etno-folklorlyq mýzykalyq qoıylymynyń dúnıege kelýine uıytqy bolyp, kásibı aqyl-keńes bergenin aıtpaı kete almaımyz.
Qazaqstannyń teatr áleminde tuńǵysh ret 2013 jyly «Múzıkl ártisi» mamandyǵynyń ashylýyna sebepker bolyp, keıin memlekettik deńgeıde múzıkl teatrynyń dúnıege kelýine erekshe at salysty. Kezinde Máskeýdegi Shepkın atyndaǵy teatr ýchılıshesin aıaqtaǵan ónerli qyz-jigitterdi Arqalyqqa alyp kelip teatr ashtyrǵan Ózbekáli Jánibekov bolsa, qazirgi jastardyń suranysynan týǵan «Astana Múzıkl» teatrynyń qurylýyna sebepker bolǵan mınıstrimiz Arystanbek Muxamedıuly ekendigi - shyndyq. Búgin bizder Avstrıanyń Vena qalasyndaǵy qazirgi zamanǵy saxna óneriniń ortalyǵy ispettes «Muth» teatrynda óner kórsetemiz. Aıtaıyn degenimiz qysyr sóz ben min taǵýshylyq indetten arylatyn ýaqyt jetti. Qazirgi jastar «sózden» sharshady. Óz isiniń kásibı mamandary ǵana sol salany kórkeıtedi. Qazirgi mádenıet jáne sport mınıstrin kásibı ónerdiń qyr-syryn meńgergen jan retinde qurmetteımiz.
