Saýd Arabıasynyń bıligi kınoteatrlardyń jumysyna salynǵan tyıymnyń alynyp tastalǵanyn málim etti. Atalmysh elde kınoteatrlar 1983 jyly jabylǵan bolatyn, dep habarlaıdy QazAqparat «Bı-bı-sı»-ǵa silteme jasap. Komersıalyq kınoteatrlardyń jumysyna 2018 jyldyń qańtarynan qaıta ruqsat etiletini týraly Saýd Arabıasynyń Mádenıet jáne aqparat mınıstrliginiń málimetinde aıtylǵan. «Bul mádenıet salasynyń ekonomıkasyn damytýda ózgeristi kezeń. Kınoteatrlardyń ashylýy ekonomıka ósimin ilgerilete túsip, ony ártaraptandyrýǵa jol ashady», - dedi mınıstr Allada Allavad.

Sondaı-aq mınıstr tyıymnyń alynyp tastalýy hanzada Muhammed ıbn Salmannyń iske asyryp otyrǵan áleýmettik jáne ekonomıkalyq reformalarynyń bir bóligi bolyp tabylatynyn atap ótti. Koróldik úkimetiniń josparynsha, 2030 jylǵa qaraı elde 300 kınoteatr ashylatyn bolady. Bul 30 myń jańa jumys ornyn ashyp, jalpy ishki ónimge 24 mlrd dollar kóleminde úles qospaq.

Aıta keteıik, elde ótkizilgen áleýmettik reformalardyń taǵy biri - kelesi jyldan bastap áıelderdiń kólik júrgizýine tyıymnyń alynyp tastalýy. Budan bólek, 2018 jyly arab áıelderine alǵash ret sporttyq stadıondarǵa barýǵa ruqsat etiledi. Saýd Arabıasynyń salt-dástúrlerine sáıkes, áıel adamnyń bilim alýyna, saıahattaýyna jáne ózge de is-sharalarǵa qatysýyna tek er adam ǵana ruqsat ete alady.