Mınıstr atap ótkendeı, negizgi kapıtalǵa salynǵan ınvestısıalardyń ósý qarqyny 2016 jylmen salystyrǵanda 2,8 esege ósip, 5,7% qurady. Jyl basynan beri jyldyq ınflásıa deńgeıi belgilengen dálizde boldy (6-8%) jáne qarashanyń qorytyndysy boıynsha 7,3% qurady.

Ekonomıkany ártaraptandyrý, agroónerkásiptik keshendi, kásipkerlikti jáne ınfraqurylymdy damytý, sondaı-aq jumyspen qamtý baǵdarlamalaryn iske asyrý nátıjesinde ekonomıkanyń barlyq salalarynda oń serpin baıqalady.

Alty negizgi salanyń naqty sektorynda ónerkásip, kólik jáne baılanys salasynda eń kóp ósý baıqalady. Taý-ken óndirisinde munaı men tabıǵı gaz óndirýdiń eki eselengen ósýine baılanysty 9,6% ósim belgilengen.

«Óńdeý ónerkásibi ósiminiń draıverleri farmasevtıka ónimderi, jıhaz shyǵarý, jeńil jáne metalýrgıa ónerkásibi, munaı óńdeý ónimderi, azyq-túlik jáne sýsyndar, sondaı-aq mashına jasaý salasy boldy. Aýyl sharýashylyǵynda ósim osy jyldyń qańtar-qyrkúıek aılaryndaǵy 1,9%-dan, 11 aıdyń qorytyndysy boıynsha 2,3%-ǵa deıin ósti», — dedi mınıstr.

Budan ózge, Tımýr Súleımenovtyń aıtýynsha, ekonomıkanyń naqty sektoryndaǵy iskerlik belsendilik, sabaqtas salalarǵa suranys týdyra otyryp, qyzmet kórsetý sektorynyń ósýin yntalandyrdy. Máselen, osy jyldyń 11 aıynda kólik qyzmetteri 4,8%-ǵa, baılanys — 3,2%-ǵa, saýda — 2,8%-ǵa, sonymen qatar jyljymaıtyn múlik operasıalary — 2,5%-ǵa ósti.

«Bıyl qańtar-qarasha aılarynda negizgi kapıtalǵa salynǵan ınvestısıalar kólemi 5,7%-ǵa artyp, 7,5 trln teńgege jetti. Investısıalardyń negizgi ósimi aýyl sharýashylyǵyna, saýdaǵa, qurylys pen ónerkásipke baǵyttaldy», — dep málimdedi mınıstr.

Baıandamashy 10 aıda ımporttyń ósýinen eksporttyń ósýiniń eki ese kóp taralýy nátıjesinde saýda teńgeriminiń saldosy 71,7%-ǵa óskenin atap ótti. Sondaı-aq, saýda teńgerimi óńdelgen ónimderdi eksporttaýdyń artyrý esebinen da jaqsardy.

Tutastaı alǵanda, eldiń syrtqy saýda aınalymy 25,6%-ǵa artyp, $62,1 mlrd qurady.

«Ekonomıkanyń turaqty ósimi áleýmettik kórsetkishterdiń jaqsarýymen qatar júrdi. Negizgi basymdyqtardyń biri jańa jumys oryndaryn ashý boldy. Máselen, osy jyldyń 9 aıynda jaldamaly qyzmetkerler sany 53,1 myń adamǵa artyp, 6,4 mln adamdy qurady», — dedi mınıstr.

2017 jylǵy qańtar-qazan aılarynda ortasha aılyq ataýly jalaqy 4,6%-ǵa artyp, 146,5 myń teńgege deıin jetti.

«Jalpy alǵanda 11 aıdyń qorytyndysy boıynsha Qazaqstan ekonomıkasy turaqty ósý qarqynyn kórsetip otyr, bul jyl qorytyndysy boıynsha JİÓ-niń 4% deńgeıinde ósýin shamalaýǵa múmkindik beredi», — dedi T. Súleımenov.

Sonymen qatar otyrys barysynda osy másele boıynsha Ulttyq bank tóraǵasy Danıar Aqyshev sóz sóıledi.