Ortalyq komýnıkasıalar qyzmetinde «Aqparat taratýda ádetten tys amaldar men túrli alańdardy qoldaný» atty dóńgelek ústel ótti. Atalǵan shara QR Aqparat jáne komýnıkasıalar mınıstrliginiń tapsyrysy boıynsha Bas redaktorlar klýbynyń uıymdastyrýymen ótti, dep Qamshy.kz aqparat agenttigi jazady.
Sharaǵa elge belgili BAQ pen memlekettik organdar ókilderi qatysty. Dóńgelek ústel barysynda sybaılas jemqorlyqqa jáne dinı ekstremızmge qarsy áreket etý barysyndaǵy aqparat taratý jumystary, BAQ pen memlekettik organdardyń baspasóz qyzmetiniń roli, halyqqa aqparat taratýdyń tıimdi joldary, BAQ pen bılik ókilderiniń arasyndaǵy iskerlik qarym-qatynasyn nyǵaıtý sekildi taqyryptar talqylandy.
Jıynda Bas redaktorlar klýbynyń prezıdenti Erlan Bekhojın jemqorlyqpen kúresý joldaryndaǵy Buqaralyq aqparat quraldarynyń róline toqtalyp, jýrnalısik zertteýler júrgizý arqyly bul máselelerdi barynsha jan-jaqtyly habarlap otyrýdy ortaǵa qoıdy. Qazaqstan Respýblıkasy Aqparat jáne komýnıkasıalar mınıstrligi Aqparat komıteti tóraǵasynyń orynbasary Rýslan Álishev mınıstrlik pen komıtet tarapynan istelip jatqan jumystar tóńireginde toqtaldy.
Bas redaktorlar klýbynyń qurmetti múshesi Kenjebolat Joldybaı «Jemqorlyq máselesi mundaı dóńgelek ústelde ǵana aıtylyp, halyqqa jetpeı jatyr. Bizde ashyqtyq bolýy kerek. Qansha mınıstr sottalǵanymen onymen másele sheshilmeıdi. Másele mınıstrdi sottaýǵa deıin jetkizbeý arqyly sheshiledi. Onyń barlyq is-qımyldary, jumys baǵyttary halyq aldynda ashyq bolýǵa tıisti. Halyq qadaǵalap otyra alatyn bolýy kerek. Sonda ǵana sheneýnikti sottalatyn dárejege deıin jibermeıdi. Bizdiń osynda aıtylyp jatqan sózderimiz de, bıliktiń sózderi de qarapaıym halyqqa túsinikti túrde ashyq jetkizilip otyrýy kerek» ,-dedi.
Sonmen qatar «Qamshy.kz» aqparattyq agenttiginiń Bas redaktory Qýanysh Bilál sóz alyp, sońǵy kezdegi mınıstrlik tarapynan bolyp jatqan kóńil bólýler men ashyqtyqty joǵary baǵalady. Jýrnalıts, L.Gýmılev atyndaǵy Eýrazıa Ulttyq ýnıversıtetiniń dosenti Qanat Áýesbaı halyqqa tolyqtaı aqparat jetpeı jatýynyń sebebin resmı aqparattardyń basym baǵyty orys tilinde ekenine aýdardy. «Qazir elimizde qazaq tildi jastar óte kóp, memlekettik tildiń qoldanysy artqan. Sondyqtan da olar osy máseleni talap eteldi. Buǵan deıin de aıtylǵan, sheshimin tappaı kele jatqan máselelerdiń biri osy»,- deıdi ol.
Sharaǵa basqa da BAQ jaýaptylary men tulǵalar qatysyp, taqyryp boıynsha oılaryn ortaǵa saldy.
