Naýryzbaı aýdanynda turǵyndardy aýyz sýmen qamtý kúrdeli máseleniń biri retinde kún tártibinen túspegen. Sý jelilerinde jylyna 300-ge deıin apat bolǵan.
Bul týraly aýdan ákimi Saıran Sáıfedenov aıtty.
Búgin Almaty qalasynyń Óńirlik komýnıkasıalar qyzmeti alańynda Almaty qalasy, Naýryzbaı aýdanynyń ákimi Saıran Sáıfedenov aýdandaǵy áleýmettik-ekonomıkalyq damýdyń nátıjeleri, aýdan ortalyqtarynda «Rýhanı jańǵyrý» baǵdarlamasynyń iske asyrylý barysy týraly málimdedi.
Aýdan ákimi 2017 jyldyń 11 aıy, ári aýdan ashylǵan 3 jyldyń ishinde atqarylǵan jumystarmen qatar, kúrdeli taqyryptardy da sóz etti.
«Turǵyndardy aýyz sýmen qamtý túıtkildi máselelerdiń biri bolyp otyr. Sý jelilerinde jylyna 300 apat bolady. Sý jetispeıtinine turǵyndar narazy. Sý jelisin júrgizý boıynsha joba ázirlendi. Osy jyldyń aıaǵy men aldaǵy jyldyń basynda memlekettik saraptamaǵa beriledi. Qarǵaly, Aqsaý ózenderiniń basynda sý tazalaý stansasy salynady. «Barlyq» bazary janynda úlken uńǵarnama qazý jumystary júrip jatyr. Aýdanda 2014 jyldan beri 118 shaqyrym jol salyndy. Keıbir eldi mekenderge aldaǵy ýaqytta sý jelileri úshin qazba jumystary josparlanyp otyrǵandyqtan asfált kirmeı otyr», - dedi aýdan ákimi.
Sonymen qatar, ol turǵyndardy elektr jaryǵymen qamtý máselesi de ózekti ekenin jetkizdi.
«Aýdanda 680 shaqyrym elektr jelisiniń 582-si jeke menshiktiń qolynda. Apat bolǵanda anyqtaý qıynǵa túsip, 1500-2000-ǵa deıin úı 2 saǵattan 20 saǵatqa deıin jaryqsyz otyryp qalady. Elektr jelilerinde aıyna 130 apattyq jaǵdaı tirkeledi», - dedi Saıran Sáfedenov.
Naýryzbaı aýdanynyń ákimi sý tasqyny boıynsha qandaı qaýipsizdik sharalary atqarylǵanyna da toqtaldy.
«Almaty qalasy Tótenshe jaǵdaılardy joıý qorynan qarajat suratyp, 4 kóshege aryq jelisi salyndy. Aýdanymyz aýmaǵynda 3 ózen aǵyp ótedi. Ózender bastaýyn taý sýynan alady. Aryq jelilerin tazartqanda dóńgelek, tońazytqyshtar shyǵady. Mysaly, bir kópirdi tazalaǵanda onyń astynan 4-5 tońazytqysh shyqqan. Qutqarý qyzmeti qys bastalmaı qazan aıynan bastap sý arnalaryn tazartyp shyqty. Kelesi jyly aqpan aıynan arnany tazalaý jumystary júredi. Naýryzbaı aýdany qalaǵa qosylǵanǵa deıin aryq júıesi 24 kóshede 21 shaqyrym edi, qazirgi ýaqytta 61 kóshede 45 shaqyrym aryq jelisi jasaldy», - dedi ol.
Aıta keteıik Naýryzbaı aýdany 2014 jyldyń 2 shildesinde qurylǵan.
