Pavlodar aýdanyndaǵy aýyldyq okrýgniń ákimi baqtashymen urysyp sóılesip, memlekettik qyzmetshiniń etıkalyq mádenıetin saqtamaǵany úshin eskertý aldy, dep habarlaıdy pavlodarnews.kz tilshisi.

Bul týraly óńirlik komýnıkasıalar qyzmetinde ótken brıfıń barysynda Pavlodar oblysy ákimi apparatynyń etıka boıynsha ókiletti Iýrıı Feldman aıtty.

- 2017 jylǵy 1-jeltoqsandaǵy statısıkaǵa sáıkes jergilikti atqarýshy organnyń 486 memlekettik qyzmetshisi tártiptik jaýapkershilikke tartylǵan, - deıdi Iýrıı Feldman. – Onyń ishinde etıka normasyn buzǵandar sany – 20, qyzmettik tártipti buzǵandar – 110 jáne basqa da buzýshylyqtarǵa jol bergen 356 adam bar. Ádep jónindegi komısıa jáne keńestiń usynystary boıynsha jergilkti atqarýshy organnyń 44 qyzmetshisine tártiptik jaza qoldandy. Naqtyraq aıtsaq, ádep kodeksiniń normalaryn buzǵany úshin – 14, memlekettik qyzmettiń abyroıyna nuqsan keltirgeni úshin – 11, basqa buzýshylyqtarǵa qatysty 19 qyzmetshi óz jazasyn aldy.

Etıka boıynsha ókiletti spıkerdiń sózine súıensek, memlekettik organdardyń qyzmetine qatysty barlyq problemalyq máseleler boıynsha oqıǵa ornyna shyǵý arqyly tekseris júrgizilgen. Osylaısha, Ýspen (jer qatynastary máselesi), Maı (aýdan ákiminiń jumysyn synǵa alý), Jelezın (Mıhaılov, Eńbekshi aýyldyq okrýgteri turǵyndarynyń ákimderine ujymdyq shaǵym jasaýy), Lebáji (aýdandyq bilim berý bólimindegi moraldyq-psıhologıalyq ahýalǵa shaǵym jáne t.b.) aýdandaryna jumys saparlary jasaldy.

- Máselen, Pavlodar aýdanynyń turǵyny habarlasyp aýyl ákiminiń baqtashymen dóreki sóıleskenin jetkizdi. Osyǵan baılanysty aýyl basshysyna eskertý berildi, - dedi Iýrıı Feldman.