Astanada №1 avtobýs parkiniń ondaǵan avtobýs júrgizýshisi men kondýktory búgin park aldyna jınalyp, jalaqysyn kóbeıtýdi talap etti dep, Qamshy.kz aqparat agenttigi Azattyqqa siltep jazady. 

Júrgizýshiler jalaqysynyń azdyǵyn, artyq jumys isteıtinin aıtyp, basshylyqtan jalaqyny kóbeıtýdi talap etedi. Júrgizýshi Ábdirahym Beısenniń Azattyqqa aıtýynsha, avtobýs júrgizýshileriniń qazirgi jalaqysy 170-200 myń teńge shamasynda.

- Biz aıyna 170-200 myń teńge kóleminde ǵana jalaqy alamyz. Artyq jumys isteımiz. Kúnine 15-18 saǵattan jumys isteıtin kezimiz bolady. Biz avtobýsty alǵan kezden bastap oǵan jaýapty bolamyz, reısten soń ony jýdyrý úshin 2-3 saǵat kezekte turamyz, - deıdi Ábdirahym Beısen.

Ábdirahym Beısen, avtobýs júrgizýshisi. Astana, 27 jeltoqsan 2017 jyl.

Júrgizýshiler jalaqysy saǵatpen esepteletinin, ıaǵnı, qala ishinde júretin úlken avtobýs júrgizýshilerine saǵatyna tólenetin aqsha 820 teńge, kishi avtobýstardyń saǵaty 720-teńge, al qala syrtyna júretin avtobýstardyń saǵaty 620 teńge ekenin aıtty. Olar bul somany kem degende 1000 teńgege deıin kóterýdi suraıdy.

Jınalǵan jumysshylardy park basshylyǵy qabyldap, eki saǵatqa jýyq ýaqyt sóılesti. Jıynnan shyqqan soń Ábdirahym Beısen Azattyqqa park dırektory Sábıt Bolatov jalaqyny kóbeıte almaıtynyn aıtqanyn habarlady. Dırektor jalaqyny kóbeıtýge qarjy tapshy ekenin, al jumys jaǵdaıyna qatysty basqa máselelerdi retteýge tyrysatynyn aıtqan.

- Basshylyqpen kezdesip, talaptarymyzdy aıttyq. Hattama toltyryp, ony ákimdikke jiberetin boldy. Jalaqyny kóbeıte almaıtynyn birden aıtty. Park terıtorıasynda janarmaı quıýda, avtobýstardy jýýda kezek, problema baryn aıttyq. Biz ózimiz kásipodaq quramyz ba dep oılaǵanbyz. Sóıtsek, parkte kásipodaq burynnan bar eken, ony bilmeıdi ekenbiz. Oǵan keńsedegi qyzmetkerler ǵana múshe eken. Júrgizýshiler soǵan qosylyp, máselemizdi kásipodaq arqyly retteımiz dep sheshtik, - dedi Ábdirahym Beısen.

Júrgizýshiler buǵan qosa eńbek qatynastary máselesin, jolaýshy tasymaly qyzmetin jaqsartý jáne basqa da ózara máselelerin talqylaý úshin aıyna bir ret park basshylyǵymen jıyn ótkizý jáne oǵan BAQ ókilderin shaqyrý talabyn da qoıǵanyn aıtty. Jınalǵandar buǵan qosa 2018 jyly jumys berýshi men jumysshylar arasynda ujymdyq kesilim jasasý talabyn da qoıǵan.

Ábdirahym Beısen degenmen jumysshylar basqa máselelerge «sabyrmen tózetinin», biraq «jalaqyny kóbeıtý talaptarynan qaıtpaıtynyn jáne ony oryndatý úshin quzyrly organdarǵa júginetinin» aıtty.

№1 avtobýs parkiniń dırektory Sábıt Bolatov jıynnan soń Azattyqqa júrgizýshiler jalaqysyn kóterýge qarjy tapshy ekenin aıtty.

Sábıt Bolatov, №1 avtobýs parkiniń dırektory. Astana, 27 jeltoqsan 2017 jyl.

Onyń sózinshe, №1 avtobýs parki – qaladaǵy memleketke qaraıtyn segiz avtobýs parkiniń biri jáne ol qaladaǵy jolaýshylardyń 50 paıyzyn tasymaldaıdy. Bolatov 2018 jyly parkke memleketten sýbsıdıa bólinetinin, jalaqyny kóterý jaıyn sol kezde qarastyrýǵa bolatynyn jetkizdi.