Elimizdegi agroónerkásip salasyn keshendi damytýdyń 2021 jylǵa deıingi baǵdarlamasy aıasynda jylyjaılar kólemin arttyrý mindeti tur. Bul jospar negizinen Almaty men Astana qalalarynyń irgesinde júzege asyrylmaq. Bul týraly Qamshy.kz aqparat agenttigi 24.kz-ke silteme berip habarlaıdy. Sondyqtan 2018 jyly Almaty oblysynda jylyjaı kólemin 20 gektarǵa ulǵaıtý kózdelgen. Al qazir mereke dastarhanyna qajet kókónispen qamtýǵa otandyq óndirýshiler qanshalyqty daıyn? Ótken jyly Almaty mańynda azyq-túlik beldeýin qalyptastyrý boıynsha 48 ınvestısıalyq joba júzege asyryldy. Tek Qarasaı aýdanynyń ózinde eki nysan iske qosyldy. Biri – jylyna 3 myń tonna alma óńdeıtin zaýyt. Ekinshisi – 24 myń tonnaǵa deıin kókónis pen jemis-jıdek saqtaýǵa arnalǵan qoıma. Almatynyń ózinde de bul baǵytta oń bastamalar bar. Indýstrıaldy aımaqta salynǵan jylyjaı soǵan dálel. 17 gektar jerdi alyp jatqan zamanaýı jylyjaı golandıalyq tehnologıamen salynǵan.

Jylyjaı qazirgi kezde jylyna 7 myń tonnaǵa deıin ónim berip, qala turǵyndarynyń kókóniske degen suranysynyń 8 paıyzyn qamtyp otyr. Jylyjaı kesheni jylyna 10 aı úzilissiz ónim beredi. Qazir munda kókónistiń 4 túri ósirilse, tek qyzanaqqa bólingen jer kólemi 5 gektar. Al osy jyly keshen kólemi jáne 12 gektarǵa ulǵaıady. Sóıtip qyzanaqtyń 11, qıardyń 2 túrin ósirip jatqan jylyjaı qala  naryǵyndaǵy úlesin 20 paıyzǵa arttyrýdy kózdeıdi. Budan bólek Almaty mańynda ósirilgen kókónistiń 50 paıyzy elimizdiń basqa da óńirlerine jóneltiletinin aıta ketý qajet.

Qazir Almatyda organıkalyq tabıǵı taza ónim ósirýmen aınalysatyn 20 kásipker bar. Aýylsharýashylyq taýarlaryn óndiretin 25 kompanıaǵa 3,5 mlrd teńge kóleminde memleket tarapynan kómek kórsetilgen. Bul – agroónerkásip salasyn damytyp, ınvestısıalyq jobalardy iske asyrý úshin jasalǵan qoldaý. Aldaǵy eki jylda qalada jylyjaı kesheniniń kólemin 25 gektarǵa arttyrý josparlanǵan. Ol júzege assa, otandyq ónim kólemi ulǵaıady jáne jańa jumys oryndarynyń ashylary sózsiz.