Úndistannyń tarıhı "Bahýbalı" serıaly

Almatylyq Natalá Gordeeva 10 jyldan beri kınoındýstrıa salasynda jumys istep keledi. Qazirgi tańda ol úndi jáne gollıvýd fılmderin túsirýge kómektesip júr. Óz ómiri, otandyq kınobıznestiń utymdy tustary men kemshilikteri týraly Natalá Tengrinews.kz portalynyń The Efır jobasyna bergen suhbatynda aıtyp berdi, dep jazady Qamshy.kz aqparat agenttigi.

Úlken kınoǵa alǵash qadam basqan sáti tarıhı «Marko Polo» serıalynyń Qazaqstandaǵy túsirilimderinen bastalǵan.

«Biz senarıshi ári rejıser Ahat Ibraevpen birlesip túrli jobalarda jumys atqardyq. «Marko Polo» Qazaqstanǵa kelgende Ahat meni shaqyrdy. Sóıtip bári ózdiginen júre berdi. Ózge de rejıserlermen tanystym, kıno álemine ene bastadym. Keıin atalmysh serıaldyń ekinshi maýsymyn túsirýge Malaızıaǵa attandym. Úndistandyq tarıhı «Bahýbalı» fılminiń túsirilimine kómektestim. Qazirgi ýaqytta Bollıvýd pen Gollıvýdtyń jobalarymen aınalysyp júrmin», - dedi Natalá.

Sondaı-aq Natalá bollıvýdtyq jobamen aınalysý barysynda otandyq menedjmentti saǵynatynyn moıyndady. «Biz Mýmbaıda bir jobamen aınalysyp júrgen ýaqytta, otandyq túsirilimderdi, bizdiń ákimshilikti qatty saǵynamyn. Olarǵa uıymdastyrýshylyq, menedjment, logıstıka jetispeıdi. Sol sebepti bizdi shaqyrady. Al kreatıvti turǵydan bizdi qajet etip turǵan joq. Olardyń qolynan bári keledi», - dedi ol.

Gollıvýdtyq jobalarda bári kerisinshe. Natalányń aıtýynsha, onda bári oılastyrylǵan. «Árkim tek ózine tıesili jumyspen aınalysady. Bir komandada ǵana jumys isteısiń. Jumys qıyn, aýyr, alaıda barlyq jaǵdaı jasalǵan. Jaqsy tóleıdi, ózderi kólikpen tasyp, tamaqtandyrady».

Qazirgi tańda Natalá bollıvýdtyq jobalardan jaqsy aqsha taýyp jatqanyn moıyndady. Muny Úndistannyń jańa deńgeıge kóterilgendigimen túsindirdi.

«Buryndary úndi kınolarynda bılep, án shyrqaý jıi bolsa, qazir tóbelesterdi jıi kezdestiremiz. Ol úshin mamandar professıonaldardy shaqyrady. Men Qazaqstanǵa kelgende, mundaǵy akterlerge az tóleıtinin baıqadym. Alaıda naryq sondaı, bul qalypty da. Meniń salamda aqsha apta saıyn beriledi. Aılyq 2 myń dollardan joǵary. Qazaqstandaǵy eń joǵarǵy aılyq 2 myń dollar. Men kóbine kaskaderlermen jumys isteımin», - dedi Natalá.  

Álemdik deńgeıdegi kaskaderlermen jumys istep, tájirıbe jınaǵan Natalá qazaqstandyq Nomad Stunts kaskaderlerin joǵary baǵalaıdy.

«Bizdiń kaskaderler tóbelesedi, shabady, órttiń de arasynda júredi, sadaqpen atady. Mundaı adamdar joba úshin yńǵaıly. Mundaıda bizdiń oıymyzǵa birden nomadtyqtar keledi. Olar jaraqat alatyndaryn bilse de, osy qadamǵa barady. Olar – kásipqoı kaskaderler».

Sońǵy 8 jylda jumys barysymen Natalá Goada turyp jatyr. «Men 4-ten 8 aıǵa deıin jalǵasatyn jobalarda jumys isteımin. Aptasyna 6 kún jumysta bolyp, 1 kún demalamyn. Demalysta Goaǵa baryp sýǵa túsemin, kúnge qyzdyrynamyn, túrli taǵamdar daıyndap, kitap oqımyn. Bir kúndik demalysymdy tek ózime arnaımyn».

«Marko Polo» fılminiń túsirilim alańynda Natalá óziniń bolashaq jary Morneni kezdestirgen. Ol Ońtústik Afrıkanyń týmasy. Qazirgi ýaqytta Jańa Zelandıada turady, mamandyǵy – ınjener-dızaıner.

Natalá Qazaqstandy, Almatyny saǵynyp júrgenin aıtady. Ol Qazaqstannyń Bolgarıa syndy bolǵanyn qalaıdy. «Bolgarıada kınonyń jalpy ishki ónimi 27 paıyzdy quraıdy. Qazaqstanda fılm túsrilimideri úshin óz lokasıasyn satýǵa barynsha múmkindik jasalǵan. Biz túrli lokasıalardy, ádemi ólkelerimizdi sata alamyz, alaıda zańdyq turǵydan bul qarastyrylmaǵan», - deıdi Natalá.

«Úıimdi, ulttyq taǵamdardy saǵynamyn. Almatyǵa kelgen saıyn Ortalyq bazarǵa baryp qazy, jaıa, shujyq satyp alamyn. Koreıa salattaryn da jaqsy kóremin. Eshqandaı meken Almatyma jetpeıdi», - dep sózin qorytyndylady Natalá Gordeeva.