Aman Tasyǵan degen esimdi alǵash jaqyn dosymnyń aýyzynan estigen edim. Ol óte jaqsy pikirin bildirdi. Ónerimen qosa eńbekqor azamat ekenin aıtyp, alǵan betinen qaıtpaıtyn qaısar azamat retinde sýrettep berdi. Stýdent bolyp júrgen ýaqytta ustazdarymyz da «Aman degen jýrnalıs jigit bar ǵoı, sol bizde bilim alǵan», dep bizdi qyzyqtyra otyryp, ózderi maqtanyp qoıatyn edi. Sodan beri Aman Tasyǵannyń ómirin, onyń kásibı jolyn jalpy adamı bolmysyn baqylaýmen boldym. Qazaqy uıańdyqtan bolar qasyna týra baryp sóılesýge qysylyp, onymen jaqyn aralasatyn, qasynda júretin adamdar arqyly kóp aqparat estip júrdim. Sol ýaqyttarda Aman aǵamyzdyń tarapyna birde-bir jaǵymsyz pikir aıtylǵan emes. Báriniń aıtary: «Ol - qazaqtyń qamyn jep júrgen azamat jáne óz isiniń naǵyz mamany», degen pikir boldy. Aman aǵamyz jaıly pikirdi tek jurt aýzynan ǵana estip qoıǵan joqpyn, «Qazaq radıosynan», odan bólek kógildir ekrannan beriletin «Keshki kezdesý» baǵdarlamasynan da estip te, kórip te kózaıym bolyp júrdim. Qoıshy, bir sózben aıtqanda ózimdi Aman Tasyǵan sıaqty bolýǵa tárbıeleı bastadym. Onyń boıynda bar qasıetterdi ózimnen izdeý degen sıaqty prosester bastalyp ketti.
Endigi kezekte, men ózgelerge Aman aǵamyzdy jarnamalaıtyn boldym. Onyń is-áreketterin úlgi retinde, ómir tájirıbelerin mysal retinde alyp qatarlastaryma aqyl aıtyp ta jibergen kezder boldy. Bir sózben aıtqanda osynyń barlyǵy shynaıy edi. Meıli Aman aǵamyzdy kúnige kórip qasynda júrmesem de syrttaı adal inisi bolyp baqtym. Áleýmettik jelige salǵan árbir aqparatyn qaldyrmaı oqyp, ózindik bir oı túıip júrdim. Al endi men sıaqty Aman aǵamyzdy úlgi etip júrgen qanshama jastar bar? Ýnıversıtet qabyrǵasynda oqyp júrgen, bolashaqta jýrnalısıka salasyna barýdy armandaıtyn stýdentterdiń Aman aǵamyzǵa uqsaǵysy keletinine bás tige alamyn. Odan bólek maqsatyn aıqyndap, qalaǵa kelip asqaq armanynyń jolyna túskisi kelip júrgen mektep oqýshylary qanshama? Olardyń bári Aman aǵamyzdyń aýzynan shyqqan sózi ańdyp otyr. Ne aıtsa sony shyn, sony durys dep qabyldaýǵa ázir. Al sońǵy kúnderi Aman aǵamyzdyń tarapyna aıtylyp jatqan jaǵymdy emes pikirlerge amalsyz qosylamyn.
Eger bizdiń halqymyzdyń qazirgi rýhanı jaǵdaıy myqty deńgeıde bolyp, adamdyq pen adaldyqtyń shyńyna sál jetpeı turǵan bolsaq onda men túsiner edim. Alaıda bizdiń qazirgi qoǵamnyń jaǵdaıyn siz óte jaqsy bilesiz. Aqyl aıtyp, as qaıyryp, bata beretin biren sarań qarıalarymyz ǵana qaldy. Olar ketken soń ne bolmaq? Tárbıeniń negizgi qaınar kózi bolǵan teledıdarymyzdyń syıqy anaý. Otbasymen otyryp kóre almaıtyn dárejege jetip tur. Esirgen, essiz estradamyzdyń syıqyn aıtpasaq ta túsinikti. Kitap degendi ataýymen umytqan bizdiń jastar qazir máńgúrttenip ana tilinde sóıleı almaıtyn bolyp bara jatyr. Al ár balanyń qolynda júretin uıaly telefondaǵy bylyqtardy aıtýdyń da qajeti joq shyǵar. Al osynyń barlyǵyna baqylaý jasaıtyn bıliktiń bizben sharýasy da bolyp otyrǵan joq. Bul bizdiń qoǵamnyń maıda máseleleri ǵana. Al endi osyndaı almaǵaıyp ýaqytta, bárimizdiń maqsatymyz el men jer bolýy kerek sátte bizge «Talklike» atty boqtyq sóz ben uıat dúnıelerge toly baǵdarlamanyń qanshalyqty qajeti bar dep oılaısyz?
Sonda bizdiń óz Otanymyzdy, súıikti Qazaqstanymyzdy shynaıy súıe almaǵandyǵymyz ba? Osy kúnge deıin aıtylyp kelgen patrıottyq sózderdiń bári jalǵan kózboıaýshylyq pen ekijúzdilik bolǵany ma?
Aman aǵa, sizdiń deńgeıińiz halyq aldynda onsyz da joǵary edi. Siz «Talklike»-tyń deńgeıine túsip kettińiz be? Joq, burynnan sol deńgeıde júrgen be edińiz?
Saılaýhan Abylaı
