Zeınetke shyǵý úshin jetkilikti jınaqtalǵan zeınetaqy qarajaty ortasha ómir súrý uzaqtyǵyna baılanysty eseptelgen. Bul suraqqa QR eńbek jáne áleýmettik qorǵaý mınıstrligi jaýap berdi, dep habarlaıdy Qamshy.kz aqparat agenttigi Tengrinews.kz saıtyna silteme jasaı otyryp.

«Kez kelgen qazaqstandyq azamat zeınetaqy qoryn merziminen erte alýǵa quqyly. Qordyń jetkilikti mólsherin esepteýdiń negizgi kórsetkishteri annýıttiń jasy, ómir súrý uzaqtyǵy jáne bolashaq tólemderdi ındeksteý bolyp tabylady. 2018 jyly zeınetaqy qoryn merziminen alý úshin jınalǵan qarjynyń mólsheri áıelder úshin 50 jasta 13 mıllıon 476 myńdy qurasa, er adamdar úshin 55 jasta 9 mıllıon 636 myń teńgeni quraıtyn bolady. Jınaqtalǵan zeınetaqy qarajatynyń jetkilikti deńgeıiniń artýy áıelderdiń eń tómengi zeınetaqysy men zeınetkerlik jasynyń ulǵaıýymen baılanysty. 2018 jyldyń 1 qańtarynan bastap eń tómengi zeınetaqy 33 myń 745 teńge bolady», - deıdi mınıstrliktegiler.

Áıel adamdardyń jasy er adamdardyń jas mólsherinen kem bolýy qajettiligine qaramastan, áıelderdiń zeınetaqy qory er adamdarǵa qaraǵanda kóbirek bolýy qajet eken.

«Zeınetaqy qarajatynyń jetkilikti bolý mólsheri elimizdegi adamdardyń ómir súrý uzaqtyǵyna baılanysty. Bul krıterıı áıel adamdar er adamdarǵa qaraǵanda uzaq ómir súredi degen statısıkaǵa qatysty jasalynyp otyr», - dep túsindirdi mınıstrlik ókilderi.

Alaıda jetkilikti zeınetaqy qorynyń mólsheri jas ulǵaıa kele ózgerip otyrady. Mınıstrliktiń habarlamasynda kórsetilgendeı, adamnyń jasy úlken bolsa, jetkilikti qarajat mólsheri sonshalyqty tómen bolady.

Vedomstvo málimetine sáıkes, ómirdi saqtandyrý kompanıasy adamdardyń zeınetaqy qorynyń qanshalyqty tómen bolǵanyna qaramastan, ómirlik jeńildikter beredi.

Aıta keter bolsaq, QR eńbek jáne áleýmettik qorǵaý mınıstri Tamara Dúısenova eger árbir qazaqstandyq azamat 23 jasynan bastap aıyna 150 myń teńge jalaqy alatyn bolsa, 45 jasqa deıin ol 10 mıllıon teńge kóleminde zeınetaqy qoryna qarajat jınaı alatyndyǵyn málimdegen bolatyn.