Búgin «Nur Otan» partıasy Tóraǵasynyń Birinshi orynbasary Muhtar Qul-Muhammed Almaty oblysyna keldi dep jazady Qamshy.kz. Muhtar Qul-Muhammed Elbasynyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty bıylǵy Joldaýynda aıtylǵan basymdyqtardy júzege asyrýǵa baǵyttalǵan kásiporyndardyń jumysymen tanysty.
Memleket basshysy aıqyndap bergen jańa mindetterge tolyq saı keletin óńirdegi birden bir kásiporyn – «Almaty-Steklo» JSHS. Sebebi, mundaǵy qondyrǵylardyń Qazaqstan boıynsha balamasy joq. Kásiporynda bes birdeı tehnologıalyq mashına jelisi jumys isteıdi. Sonyń nátıjesinde banki, quty sıaqty áınek ydystardyń kez kelgen túrin daıyndaýǵa múmkindik bar. Tipti zaýyttyń jekeleı tapsyrystar boıynsha da ónim óndirýge tolyq qaýqary bar. Bul jerde jylyna 120 mıllıonǵa deıin shyny qutylar men bankiler shyǵarylady. Kásiporyn basshylarynyń aıtýynsha, bul jerdegi ónimder sapasy jaǵynan álemdik etalondarǵa tolyǵymen saı keledi.
Seriktestiktiń eńbek ujymymen kezdesken Muhtar Qul-Muhammed Elbasymyz óziniń jańa Joldaýynda aıtqan Tórtinshi ónerkásiptik revolúsıa dáýiri óndiris oryndarynan sońǵy úlgidegi tehnologıalardy keńinen engizýdi talap etetinine nazar aýdardy. Bul – jahan kóshinen qalmaı, álemdik ózgeristermen qatar damýǵa úlken septigin tıgizetin mańyzdy qadam. Sondyqtan «Almaty-Steklo» sıaqty zamanaýı kásiporyndar da Elbasy aıtqan jańǵyrý men sıfrlandyrýdy júzege asyrýda asa belsendi bolýy tıis.
– Elbasymyz óziniń búgingi Joldaýynda eń joǵary sıfrlyq tehnologıa negizinde el ekonomıkasyn damytýdyń 10 basym baǵytyn aıqyndap berdi. Eń bastysy, otandyq kásiporyndardyń shyǵarǵan ónimderi eksport talaptaryna saı bolýy tıis. Osy turǵydan kelgende Avstrıa jáne Italıa tehnologıalarynyń negizinde jumys isteıtin «Almaty-Steklo» zaýyty qazirdiń ózinde ónimderin álemniń kóptegen elderine eksporttaýda. Buryn Almaty oblysy negizinen agrarlyq óńir retinde sanalyp kelse, ındýstrıalandyrýdyń nátıjesinde agrarly-ındýstrıaldy aımaqqa aınaldy. Ótken jyly oblystyń óndiristik ónim kólemi 750 mıllıard teńgeni qurady. Qazir biz turǵan bir ǵana ındýstrıaldy aımaqta 17 jańa kásiporyn iske qosyldy. Sondyqtan Elbasymyz ekonomıkany jańǵyrtyp qana qoımaı, aldymyzǵa álemdik básekege qabiletti ónim shyǵaratyn osyndaı kásiporyndardy kóptep ashý jóninde jańa mindetter qoıyp otyr, – dedi «Nur Otan» partıasy Tóraǵasynyń Birinshi orynbasary Muhtar Qul-Muhammed.
Sonymen qatar, partıa Tóraǵasynyń Birinshi orynbasary oblys ákimi Amandyq Batalovpen birge kondıterlik ónimder shyǵaratyn «A Product» JSHS-da boldy. Odan bólek, «Rýhanı jańǵyrý» baǵdarlamasy aıasynda salynyp, 2017 jyldyń qyrkúıek aıynda paıdalanýǵa berilgen «Batyr babalar» memorıaldy kesheni men Shamalǵan aýylynda jańadan ashylǵan Elbasy, Qazaqstan Respýblıkasy Tuńǵysh Prezıdentiniń «Atameken» tarıhı-mádenı ortalyǵynda boldy.
Sapar sońynda Muhtar Qul-Muhammed «Nur Otan» partıasynyń oblystyq, aýdandyq, qalalyq fılıaldary men bastaýysh partıa uıymdaryna Elbasy Joldaýyndaǵy barlyq basym baǵyttyń júzege asyrylýyn qatań baqylaýǵa alýdy jáne bul mańyzdy qujattyń máni men maǵynasyn Almaty oblysynyń árbir turǵynyna túsindirý júmystaryn júıeli túrde júrgizýdi tapsyrdy.
