QR Aqparat jáne komýnıkasıa mınıstrligi ulttyq aqparattyq keńistiktiń avtomattandyrylǵan monıtorıń júıesin óz ıeligine alady. Ony 2018 jyldyń sońyna deıin aıaqtaý josparlandy. Bul týraly Tengrinews.kz habarlady, dep jazady Qamshy.kz aqparat agenttigi.

«Ulttyq aqparattyq keńistiktiń avtomattandyrylǵan monıtorıń» júıesin qurý maqsatynda respýblıkalyq búdjetten 1,671 mıllıard teńge bólindi.

Júıe derekterdiń iri kólemin óńdeý prınsıpterinde jumys isteıtin biryńǵaı baǵdarlamalyq-apparattyq keshen bolady dep boljanýda.

«Júıeni ázirleý memlekettik satyp alý týraly zańnamada kózdelgendeı tıisti baıqaý rásimderin oryndaǵannan keıin júzege asady. Júıeni ázirleýdiń basty maqsaty «Buqaralyq aqparat quraldary týraly» QR Zańynyń 4-3-babynyń 13-1 bóliminde qarastyrylǵan BAQ salasyndaǵy ókiletti organnyń fýnksıasyn iske asyrýdyń tıimdiligin arttyrý», - delingen QR Aqparat jáne komýnıkasıa mınıstrliginiń habarlamasynda.

Vedomstvonyń málimetine sáıkes, búgingi tańda monıtorıń ókiletti organda tirkelgen respýblıkalyq ári óńirlik tele jáne radıo arnalardy, baspa men aqparattyq agenttikterdi, jelilik resýrstardy qamtıdy. Barlyǵy shamamen 930 BAQ. Sondaı-aq Qazaqstan Respýblıkasynyń zańdaryna nuqsan keltiretin aqparattardy anyqtaý úshin áleýmettik jeliler men Internet jelisiniń sheteldik segmentine monıtorıń júrgiziledi. Aqparattyq júıe qurylǵan soń BAQ-ty qamtý aýqymy keńeıedi.