Reseıdiń Máskeý oblysyndaǵy Kolomna qalasynda azamattyq belsendi Valentın Sokolovty áleýmettik jelide "óshpendilik qozdyrǵany" úshin sot úkimimen úsh jylǵa bas bostandyǵynan aıyrylǵan. Belsendini sot zalynda qamaýǵa alǵan dep habarlaıdy Qamshy.kz aqparat agenttigi azattyq.org saıtyna silteme jasaı otyryp. Bul týraly Sokolovtyń áıeline silteme jasap Facebook áleýmettik jelisinde reseılik belsendi Vácheslav Egorov habarlaǵan.

Áleýmettik jelilerde jarıalaǵan vıdeo jáne sýretter úshin Valentın Sokolovtyń ústinen "óshpendilik qozdyrǵan" jáne "adamnyń ar-namysyn qorlaǵan" degen aıyptarmen qylmystyq is qozǵalǵany týraly qańtardyń 10-y kúni belgili bolǵan. Tergeýshiler belsendi "Odnoklassnıkı" áleýmettik jelisinde jarıalaǵan sýret pen jazbany «orystarǵa qarsy óshpendilikti qozdyrady», al Facebook jelisindegi paraqshasynda jarıalaǵan eki vıdeorolıkti «rasıstik sıpatta» dep tapqan.

Sokolov bolsa "Odnoklassnıkı" jelisindegi paraqshasyna "Mundaı sandyraqty aıtý úshin qanshalyqty esýas bolý kerek deseńizshi. Álde ádeıi qozdyryp otyr. Oqýǵa qorqasyń" degen komentarı jazyp, daýly sýretti basqa bireýdiń paraqshasynan kóshirip jarıalaǵanyn aıtady.

Alaıda kóshirip jarıalaǵan kezde sýret qoldanýshynyń paraqshasynda jáne "Ártúrli" papkasynda saqtalyp qalady, tergeý oryndarynyń belsendige aıyp taǵýyna da osy sebep bolǵan dep habarlaıdy OVD-Info saıty.