«Stalınniń ólimi» atty kınokartına elimizde 25 qańtar beısenbi kúni jaryq kórýge tıis edi, dep jazady Qamshy.kz aqparat agenttigi Vlast.kz saıtynyń málimetine súıene otyryp.

23 qańtarda Reseı Federasıasynyń Mádenıet mınıstrligi 25 qańtarda jaryqqa shyǵýy tıis bolǵan «Stalınniń ólimi» kınokartınasyna berilgen keskindeme sertıfıkatyn qaıtaryp aldy. Atalmysh uıymnyń zańgerleri bul komedıanyń eshqandaı da tarıhı, mádenı qundylyǵy joq jáne de bul fılmde keńestik rámizder – ánuran, medaldar men buıryqtar – qorlanǵan degen sheshimge keldi.

Jergilikti tilshiler reseılik «Volga» kompanıasyna «Qazaqstandyqtar bul fılmdi kóre alady ma?» degen saýal joldaǵan bolatyn. Belgili bolǵandaı, «Stalınniń ólimi» kınokartınasy bizdiń elimizde de kórsetilmeıtin boldy, sebebi bul fılmnen barlyq kınoteatrlar bas tartqan eken. Bul jaıynda «Volga» kompanıasynyń ókili Iýlıa Fateeva málimdedi.

Derekterge sáıkes, bul fılmdi bir kınoset pen bir mýltıpleks qabyldaýǵa kelisim bildirgen bolatyn, alaıda olar da keıinnen raıynan qaıtypty.

 «Stalınniń ólimi» kınokartınasy 2010 jyly jaryq kórgen komıks kitaptyń ekrandyq nusqasy bolyp tabylady. Fılmde Stalınniń ómirindegi sońǵy saǵattar jáne onyń bılik úshin qalaı kúreskendigi jaıly kórsetiledi. Bul kınoda Stıv Býshemı, Djeıson Aızeks, Olga Kýrılenko, Djeffrı Tembor atty ártister oınaǵan. AQSH-ta bul fılm naýryz aıynda kórsetiletin bolady. Al Qazaqstanda «Stalınniń ólimi» kınokartınasy Reseımen birdeı ýaqytta kórsetilýi tıis bolatyn. Rotten Tomatoes saıty bul fılmge 97% jaqsy degen reıtıń berip, ortasha 8,3/10 degen balmen baǵalaǵan.

Aıta keterlik jaıt, Reseıde daý týdyrǵan kınokartınalar Qazaqstanda da jaryqqa shyqpaı qalǵan bul birinshi jaǵdaı emes. 2015 jyly «Intervú» jáne «Nomer 44» atty kınolar dál osyndaı sebeptermen prokattan alynyp tastalǵan bolatyn.