Onyń ómiri Gollıvýdtyń «Avıator» fılmin eske salady dep jazady qamshy.kz tilshisi.

Sújet boıynsha Govard Húz ákeden qalǵan mol murany ushaq qurastyrýǵa jumsaıdy. Tutas memleket bolyp qolǵa alatyn jobany óz aqshasyna júzege asyrǵan avıator amerıkalyqtardyń sanasynda ult batyry retinde qaldy. Al bizdiń keıipker Serikqazy Qurmanǵalıevtyń Govardtan aıyrmashylyǵy, ákesi áıgili ónertapqysh ta, mılıoner de emes.   Serikqazy Qurmanǵalıev toqsanynshy jyldardaǵy qarbalasta Reseı men Qytaıdan energetıka salasyna qajet qondyrǵylar tasymaldap, azdy-kópti dáýlet jıǵan. Qazaqstannyń alǵashqy ushaǵyn kókke kóterý armany ony sátti bastalǵan kásipkerlik joldan buryp, avıasıaǵa aýdaryp jiberse kerek.

  «1999 jyl. Memleket daǵdarystan áli es jıa qoımaǵan kez. «Ásker, avıasıa, flotqa erikti kómek» qoǵamynyń (DOSAAF) beldi músheleri Gennadıı Sharkýtov, Sergeı Netýnaev, Vladıslav Parı aǵaıyndy Bolathan ekeýimizdiń ıdeıamyzdy júzege asyrýǵa atsalysty. Avıasıa salasynda dıplomymyz bolmasa da, tehnıkaǵa degen áýestik bizdi úlken maqsattarǵa jeteledi. Áskerde de strategıalyq mańyzdy tehnıkalardyń tizginin ustap mashyqtanǵandyqtan, ushaq qurastyrýǵa qajet tehnologıany ózimiz daıyndadyq» - dep eske alady Serikqazy Qurmanǵalıev.   Sóıtip, tynymsyz eńbektiń nátıjesinde eki jyl degende eki kisilik ushaq daıyn bolady.

Tipti Óskemenniń shetinde synaqtan sátti ótedi de. Osy jobasyn táýelsizdiktiń 10 jyldyǵyna arnaý úshin keıipkerimiz bala-shaǵasynyń aýzynan jyryp, jınaǵan qarjysynyń bárin salǵan eken.   «Ushaqqa sertıfıkatty Reseıden alý kerek bolatyn. Ol jaqtan kelgen sarapshylar «Qarlyǵashtan» jalǵyz min tapty. Biz paıdalanǵan burandalardyń arnaıy sertıfıkaty joq bolatyn. Oǵan tipti mán de bermeppiz. Osylaısha, sarapshylardyń keńesimen barlyq burandany «VAZ» zaýytynyń ónimderimen almastyrdyq. 50 saǵat áýede qalyqtap, ár qanaty 20 adamnyń salmaǵyna shydas beretini dáleldengen soń, reseılik sarapshylar sońǵy tekserý úshin ózderine shaqyrdy» - dep eske alady ónertapqysh.

  Ol jaqtaǵy tekserýden Serikqazynyń «Qarlyǵashy» saý qaıtpaıtyny aldyn ala eskertilipti. Ushaqty bastan-aıaq tekserý úshin túgeldeı shashyp, qıratý qajet-tuǵyn. Serikqazy men joldastary oǵan da kónedi.

Alaıda, áýe tehnıkasyn Reseıdiń shekarasyna kirgizý úshin resmı Máskeýdiń ruqsaty qajet edi. Serikqazynyń joldaǵan hattaryna joǵary jaqtan jaýap bolmaı, joba aıaqsyz qaldy. El arasynda «Serik-samolet» degen laqap atqa ıe bolǵan ónertapqysh qańqý sóz ben mysqylǵa shydaı almaı, qańtarýly qalǵan ushaǵyn tanysyna syılap jiberedi. «Qarlyǵashtyń» odan keıingi taǵdyry beımálim.    «Qolymyzda eki kisilik ushaqtan jolaýshy tasymaldaýshy ushaqqa deıin jetýdiń jospary boldy. Sol kezde tehnologıamyz sertıfıkatqa ıe bolsa, ınvestor tabar edik. Búgin aspanymyzda otandyq ushaqtar da samǵap júrer me edi?

Bizdiń eki kisilik ushaqtarmen egis alqaptaryn tyńaıtyp, zalalsyzdandyrý jumystaryn júrgizýge bolatyn. Áýeden patrúldeý tikushaq qyzmetinen áldeqaıda arzanǵa túser edi. İshki týrızmdi damytýǵa da shaǵyn ushaqtar asa yńǵaıly. Biraq jolymyz bolmady. Qazir sol bir shabytty shaqtardan estelik retinde sarǵaıǵan fotosýretter ǵana qaldy» - dep kúrsinedi Serikqazy Qurmanǵalıev.  

   Ónertapqysh mańdaıy tasqa tıse de, qarsy kelgen qıyndyqqa qasqaıyp turypty. Olaı deıtinimiz, búginde 6,3 tonnalyq qurylys krandaryn qurastyrýdy qolǵa alǵan. Biraq, eki jyldyń ishinde ol «óndirgen» krannyń ekeýi ǵana ótipti. Ómiriniń jartysyna jýyǵyn ónertabysqa arnaǵan Serikqazynyń bul kúnde ótkenge ókinishi kóp. Bir jubanary, ol «men quraǵan «Qarlyǵash» Qazaqstan tarıhyndaǵy tuńǵysh otandyq ushaq retinde qalady» dep oılaıdy.