Órtengen avtobýstyń úsh júrgizýshisi tergeý ızolátoryna qamaldy. Bul týraly Aqtóbe oblystyq prokýratýrasynyń apparat jetekshisi Jasulan Dáýlembaev óziniń Facebook paraqshasynda habarlady, dep jazadyQamshy.kz aqparat agenttigi.
Júrgizýshilerde Qazaqstan Qylmystyq kodeksiniń 345-baby (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) 4-tarmaǵy boıynsha aıyp taǵylǵan. Bul tarmaq boıynsha bes jyldan on jylǵa deıin bas bostandyǵynan aıyrý jazasy qarastyrylǵan.
Jasulan Dáýlembaevtyń málimetinshe, avtobýstaǵy órtten aman qalǵan úsh qazaqstandyq 24 qańtar kúni keshki onda Aqtóbedegi tergeý ızolátoryna qamalǵan. Kúdiktilerdi ishki ister mınıstrligi tergeý departamentiniń jedel-tergeý toby tergep jatyr. Aldyn-ala tergeý kezinde avtobýs júrgizýshileriniń salondy dánekerleýshi lampamen jylytyp, avtokólikti paıdalaný erejesi men órt qaýipsizdigi erejesin buzǵany anyqtalǵan.
Tergeý avtobýstyń órtenip ketýine úsh júrgizýshini de aıyptaıdy. Bul qylmystyq istiń tergelý barysyn baqylaý prosesýaldyq prokýrorlar tobynyń 1-qyzmetine, Aqtóbe jáne Ońtústik Qazaqstan oblystyq prokýratýrasyna júktelgen.
Jasulan Dáýlembaev isti Qazaqstannyń bas prokýratýrasy men ishki ister mınıstrligi de baqylap otyrǵanyn habarlady.
Aıta keteıik, Aqtóbede avtobýs órtenip, 52 adamnyń qaza tapqany jaıly habarlanǵan bolatyn. Ikarus markaly avtobýstyń 18 qańtarda saǵat 10:30-da Aqtóbe oblysy Yrǵyz aýdanynda Samara - Shymkent tasjolynyń 1068 shaqyrymynda, Qalybaı aýylynan 10 shaqyrym jerde órtengeni aıtylǵan edi. Avtobýstyń ishinde 55 jolaýshy jáne eki júrgizýshi bolǵan. Onyń beseýi avtobýstan shyǵyp úlgergen.
