Ortalyq Azıa memleketteriniń basshylary alǵash ret resmı samıte bas qosady. Bul ýaqytqa deıin 5 eldiń basshylary beıresmı túrde, eki jaqty, úsh jaqty nemese TMD, SHYU, EýrAzEQ sheńberinde kezdesýler ótkizgen, dep jazady Qamshy.kz aqparat agenttigi News.tj saıtynyń málimetine súıene otyryp.
Qazaqstan jáne Ózbekstan Prezıdentteriniń bastamasymen Ortalyq Azıa memleketteriniń basshylary Naýryz meıramy qarsańynda Astana qalasynda alǵashqy samıtin ótkizbek.
Derekterde kórsetilgendeı, aldaǵy ýaqytta ótetin bul samıt Ortalyq Azıa elderi arasyndaǵy qarym-+qatynastyń jańa deńgeıge kóterilýine úlken septigin tıgizbek jáne de aımaqtaǵy barlyq elderdiń múddelerin qanaǵattandyratyn jańa baǵdarlamalar men jobalardyń iske asyrylýyna túrtki bolady.
«Bizdiń elimiz táýelsizdikke qol jetkizgennen beri barlyq eldermen qarym-qatynasyn jaqsartyp, aımaqtaǵy barlyq elderdiń tyǵyz ıntegrasıasyn qoldap keledi. Jáne de eshqashan da mundaı samıtterdi eleýsiz qaldyrmaıdy», - dep málimdedi Tájikstan úkimeti.
Belgili bolǵandaı, samıttiń naqty datasy áli kelisý satysynda tur.
«Ortalyq Azıa memleketteriniń aldynda turǵan ortaq maqsat – halyqtyń erkin qoǵalysy, kapıtaldyń kedergisiz qozǵalysy jáne ınvestısıa men eńbek úshin óńirde qolaıly klımat qurý qajettiligin talap etedi.
Os qaǵıdany eskere otyryp, qazirgi zamanǵy jahandyq qaýip-qaterlerge qarsy turý úshin biz qaýipsizdik salasyndaǵy yntymaqtastyǵymyzdy da arttyra alamyz.
Bizdiń oıymyzsha, shyǵarmashylyq aımaqtyq yqpaldastyq Ortalyq Azıanyń barlyq memleketteri men halyqtarynyń múddelerin beıneleıdi», - dep málimdedi Emomalı Rahmon.
Halyqaralyq ister boıynsha keńes tóraǵasy, saıasatker Erlan Qarınniń aıtýynsha, Ortalyq Azıa elderiniń basshylary sońǵy 10 jylda alǵash ret bas qosaıyn dep otyr jáne de 2018 jyl Ortalyq Azıa memleketteri úshin óńirlik yntymaqtastyq salasyndaǵy mańyzdy kezeń bolyp tabylady.
«Aǵymdaǵy jylda Ortalyq Azıa elderi arasyndaǵy qarym-qatynas barlyq salada damı túsedi. Elder arasyndaǵy qarym-qatynas bul turǵyda qozǵaýshy kúshke aınalady», - deıdi ol.
«2017 jyly Ortalyq Azıa basshylary eki jaqty kezdesýlerdi óte kóp ótkizdi. Bul jyly mundaı kezdesýler barlyq aımaqty qamtyp, kóp jaqty formatta ótýi ábden múmkin. 2018 jyly elder arasyndaǵy qarym-qatynas jańasha formatta damıtyn bolady», - dep qosa aıtyp ótti Erlan Qarın.
Álemdik bank boljamyna sáıkes, 2018 jyly aımaqtaǵy ekonomıkalyq ósim 2,7%-ǵa jetýi múmkin.
Qazirgi ýaqytta Ortalyq Azıa basshylarynyń jańa kezdesýleri men resmı saparlary josparlanýda.
Ózbekstan prezıdenti Shavkat Mırzıeev kóktemniń basynda Tájikstan eline resmı saparmen barýǵa daıyndalyp jatqandyǵyn aıtty.
«Jaqynda biz birqatar kelisimderge qol qoıamyz, Ortalyq Azıadaǵy biryńǵaı energetıkalyq júıeni qalypqa keltiremiz, temirjoldy iske qosyp, basqa da máselelerdi talqylaıtyn bolamyz», - dep málimdedi Shavkat Mırzıeev.
