Davosta ótken 48-shi Búkilálemdik ekonomıkalyq forým keshe aıaqtaldy. Osy keleli keńeske jınalǵan eldiń nazary Kanada premer-mınıstri Djastın Trúdonyń shulyǵyna eriksiz aýǵany kesheli beri álem baspasózinde qyzý talqylanyp jatyr. Sebebi ol asa mańyzdy jıynǵa sary balapandar beınelengen kúlgin tústi shulyq kıip kelgen eken. Bir qyzyǵy, sheteldik BAQ jarysa jazǵan kúlgin shulyqtyń áńgimesin qazaqstandyq jýrnalıser elemeı qoıǵan tárizdi. Birdi-ekili saıt bolmasa, kópshilik baspasóz bul jóninde lám-mım demedi. Osyǵan qarap, biz munyń ózindik sebebi bar-aý dep shamalaımyz.
Aldymen Djastın Trúdo týraly birer sóz. Kanada úkimet basshysynyń erekshe shulyq kıý úlgisimen jurtty tań-tamasha etip kele jatqanyna biraz ýaqyt boldy. Máselen ótken jyldyń mamyr aıynda Irlandıalyq áriptesi Endo Kennımen kezdesken. Osy kezdesýde de kóptiń nazary eriksiz Djastın Trúdonyń aıaǵyna aýdy. Óıtkeni onyń shulyǵyndaǵy sýret «Juldyzdy jaýyngerler» kıno-dastanyn eske túsiretin. Al mamyrda NATO odaǵyna kiretin elder basshylary men premer-mınıstrleri Brússel qalasynda bas qosqan edi. Bul jıynǵa Djastın Trúdo NATO uıymynyń logotıpi beınelengen qyzyl shulyq kıip kelip, kópshilikti taǵy bir márte tobyǵyna tesiltken. Ony Germanıı kansleri Angela Merkel sýretke tartyp alyp, Instagram paraqshasyna jarıalaǵany da biraz jurttyń esinde bolýy kerek. Qysqasy, Kanada premeri ózgeshe shulyǵy arqyly atyn shyǵarýdan jalyǵar emes.
Al oǵan otandyq BAQ-tyń nazar aýdarmaı qoıýyna ne sebep? Ózińiz bilesiz, shulyqqa tosyn tańdaý jasaý «mádenıeti» bizge de tańsyq bolýdan qalǵan. 2016 jyly «Astana-Dýatlon-2016» jarysy ótip, oǵan Ádilbek Jaqsybekov, Arystanbek Muhamedıuly, Bolat Jámishev sıaqty birqatar shonjardyń qatysqany kúni keshegideı esimizde. Sol kezde ǵoı, burynǵy úkimet basshysy Kárim Másimovtiń aıaǵyna eki túrly shulyq kıip kelip, kópti kúlkige qaryq qylǵany. Tipti bul týraly aıtpaǵan BAQ kemde-kem. Baspasózdi ýlap-shýlatqan ol oqıǵa da qazir jurt jadynan shyǵyp bara jatyr. Biraq jýrnalıserdiń kóńil túkpirinde saqtaýly. Djastın Trúdonyń birtúrli shulyq kıisine áriptesterimizdiń nazar aýdarmaı qoıýyn, mine, biz osydan izdeımiz. Sirá, jýrnalıs myrzalar «E, qudaı-aı, ózgeshe shulyq kıý de óner bolyp pa, ol bizdiń Kárimnen qalǵan ǵoı!» deıtin tárizdi. Kim biledi, solaı bolsa, solaı da shyǵar...
Asylhan Atqumar
