Nursultan Nazarbaev Mılosh Zemanǵa Cheh Respýblıkasynyń Prezıdenti laýazymyna qaıta saılanýyna baılanysty quttyqtaý jedelhatyn joldady, dep jazady Qamshy.kz aqparat agenttigi Aqordanyń baspasóz qyzmetine silteme jasap.
Qazaqstan Prezıdenti Nursultan Nazarbaev M.Zemandy Cheh Respýblıkasy Prezıdentiniń saılaýyndaǵy jeńisimen quttyqtady.
«Sizdiń jeńisińiz elińizdi odan ári damytýdy kózdeıtin baǵytyńyzǵa degen halyq seniminiń aıqyn dáleli bolyp sanalady.
Biz bıyl dıplomatıalyq qarym-qatynasymyzdyń 25 jyldyǵyn atap ótemiz. Shırek ǵasyr ishinde Qazaqstan men Chehıa arasyndaǵy ózara is-qımyldyń joǵary deńgeıge kóterilgenine qýanyshtymyn.
Qazaqstan men Chehıa arasyndaǵy yntymaqtastyq elderimizdiń ıgiligi úshin ózara seriktestik rýhynda jalǵasa beretinine senimdimin. Sizge zor densaýlyq, jaýapty qyzmetińizge tabys, al dostas Chehıa halqyna beıbitshilik pen baq-bereke tileımin», – delingen jedelhatta.
