HHİİİ qysqy Olımpıada oıyndary 2018 jyldyń 9–25 aqpan aralyǵynda ótedi. Álemniń 80-ge jýyq elinen 5000-nan astam sportshy men resmı tulǵalar qatysady dep josparlanǵan.

15 sport túrinen 102 medaldar jıyntyǵy oınatylady (bıatlon — 11, bobsleı — 3, skeleton — 2, kerlıng — 3, kónkımen júgirý sporty — 14, mánerlep syrǵanaý — 5, short-trek — 8, taý shańǵy sporty — 11, shańǵy qossaıysy — 3 , shańǵy jarysy — 12, shańǵymen tramplınnen sekirý — 4, frıstaıl — 10, snoýbord — 10, shana sporty — 4, shaıbaly hokeı — 2).

Arystanbek Muhamedıuly atap ótkendeı, ulttyq quramanyń aldaǵy Olımpıada oıyndaryna 9 sport túri boıynsha 57 lısenzıasy bar: bıatlon — 10, short-trek — 12, kónkımen júgirý sporty — 12, shańǵy jarysy — 7, mánerlep syrǵanaý — 3, frıstaıl mogýl — 4, frıstaıl akrobatıka — 5, taý shańǵy sporty — 2, shańǵymen tramplınnen sekirý — 1, shana sporty — 1.

«1994 jyldan 2010 jylǵa deıingi aralyqta ótken qysqy Olımpıada oıyndarymen salystyrǵanda, qazaqstandyq delegasıa 2018 jyly ótetin Olımpıada oıyndaryna kóbirek lısenzıaǵa ıe boldy», — dedi Arystanbek Muhamedıuly.

Budan ózge, mınıstr Olımpıada oıyndarynyń bastalýyna deıin qysqy sport túrleri boıynsha ulttyq komandalar oqý-jattyǵý jıynymen jáne lısenzıalyq jarystarǵa qatysýmen qamtamasyz etilgenin aıtyp ótti.

Joǵary nátıjege qol jetkizýdiń mańyzdy faktory retinde sportshylardy sapaly quraldarmen jáne jabdyqpen qamtamasyz etý máseleleri sheshildi. Sondaı-aq, Dúnıejúzilik dopıngke qarsy agenttik usynatyn qajetti sharalardy ýaqytyly jáne sapaly baqylaýǵa ári júzege asyrýǵa erekshe nazar aýdarylady.

«Olımpıadalyq delegasıa aldyndaǵy mindet — Sochıdegi Olımpıada oıyndarynyń qorytyndysynan tómen nátıje kórsetpeý», — dep qorytyndylady Arystanbek Muhamedıuly.

Atalǵan máseleni qaraý barysynda Ulttyq Olımpıada komıtetiniń bas hatshysy Danıar Ábilǵazın de sóz sóıledi.

Premer-mınıstr Baqytjan Saǵyntaev ulttyq quramaǵa Olımpıada oıyndarynda jaqsy nátıje kórsetýdi tiledi.

«Qysqy Olımpıada oıyndarynyń bastalýyna az ýaqyt qaldy, onyń ashylýyn asyǵa kútemiz jáne sportshylarymyzǵa sáttilik pen jeńis tileımiz. Sportshylarymyz el úmitin aqtap, medaldarmen oralady dep úmittenemiz», — dep tiledi Baqytjan Saǵyntaev.