Tekeli qalasy arbat mańyndaǵy kóp qabatty úı alańynda aıazǵa qaramastan qara qurym adam. Kóshege oınaý úshin balalar, qart kisiler men kishkentaı balalary bar analar shyqqan. Buǵan deıin osynda tıisti balalar alańy men abattandyrý bolmaǵan.

Biraq bul jerdi jergilikti kásipker Qýanyshbek Erǵojanov adam tanymastaı ózgertti.

Almaty oblysy Kásipkerler palatasy baspasóz qyzmetiniń málimetine súıensek, jeke qarajatyna ol aýmaqty abattandyryp, qumsalǵysh, átkenshekter men týrnıkter salyp bergen. Bul ıgi isine úı turǵyndary ǵana emes, jalpy tekelilikter men qala basshylyǵy dán rıza. Balalar alańynyń qurylysyn kásipker prezıdenttiń «Bolashaqqa baǵdar: rýhanı jańǵyrý» atty baǵdarlamalyq maqalasyn júzege asyrýǵa baǵyttalǵan «Atamekenim» respýblıkalyq aksıasy aıasynda bastady.

«Ózderińiz biletindeı, ótken jyly Memleket basshysy «Rýhanı jańǵyrý» baǵdarlamalyq maqalasyn jarıalap, bıznesmenderdi qoǵamǵa paıda ákelýge, eń aldymen týǵan jerine kómek kórsetýge shaqyrdy. Búgingi tańda áleýmettik jaýapkershilik kásipkerlik qyzmettiń ajyramas bóligine aınalý kerek. Sondyqtan, meniń oıymsha ár adam bızneste bolsyn, basqa salada bolsyn, óziniń múmkindikterine qaraı aınalasyna qoldaý bildirip otyrýy tıis», - dep atap ótti kásipker.

52 jastaǵy Qýanyshbek Erǵojanovtyń kásibi metal qurastyrylymdaryn shyǵarýmen baılanysty. Tekelidegi sehynda metal men túrli qorytpadan buıymdar daıyndaıdy. Balalar alańqaıy kásipkerdiń alǵashqy qaıyrymdylyq jobasy emes. Ol turaqty túrde az qamtylǵan januıalarǵa járdemdesip, aǵash pen metaldan jasalǵan jıhazdardy syılap otyrady.

«Tekeliniń bıznes qoǵamdastyǵy barlyq baǵyt boıynsha álýmettik jaýapkershilikterin kórsetip keledi. Mysaly, Jańa jyl aldynda isker áıelder «Tekeli Asar» qaıyrymdylyq jobasyn bastaǵan. Adamdar satyp alǵan zattaryn qala dúkenderinde arnaıy jasalǵan sórelerge qoıyp, áleýmettik jaǵynan az qamtylǵan adamdarǵa kómektese alady. Sonymen birge, kásipkerler jas sportshylardy únemi qoldap, rspýblıkalyq jáne halyqaralyq birinshilikterge qatysýǵa demeýshilik tanytyp otyrady», - deıdi Kásipkerler palatasynyń Tekeli qalalyq fılıalynyń dırektory Turysbek Jumadilov.

Sondaı-aq Jumadilovtiń aıtýynsha, tekelilik kásipkerler múmkindigi shekteýli balalardy óz qamqorlyqtaryna alǵan.