Kezekti bir jıyn ótkizip jatyrmyn. Taqyryp: «Jınalystarda uıyqtamaý turaly jınalys». Oblys ákimi qyzmetinde júrip, mundaı taqyrypty birinshi ret qozǵap otyrmyn. Áńgimeni áriden bastaı bergenim sol, artqy jaqtan qoryldaǵan daýys estildi. Sálden keıin yryldaǵan, artynsha syryldaǵan qoryldar estilip jatty.

Sheneýnikter ózi úılerinde uıyqtaıdy ma ózi? Álde túnimen jún tútip, kúbi pisip, birdeńe iship,  keýip–isip jatady ma? Qashan kórsem osy! Memlekettik mańyzdy máselelerdi talqylap jatsaq ta, pyryldap jatqandary. Budan bylaı jınalysty shalqamyzdan jatyp alyp ótkizemiz–aý, deımin? Qus jastyqty jastanyp degendeı...

Bir qarasam, zaldaǵynyń bári uıqyǵa ketipti... Pys-pys, ys-ys etken dybystar da barshylyq.

–Oıan, qazaq! –dep daýystap edim, bireýi selt etpedi. Oıpyrmaı, depýtattar ǵana uıyqtaıdy dep júrsem, qaramaǵymdaǵy sheneýnikter de maýbastar eken ǵoı?

–Oıan, qazaq, qalǵyma!

Qoryldar odan saıyn údedi.

–Men qazaqpyn, myń ólip, bir tiriligen...

Selt etpedi. Báriniń ústine kórpe jaýyp, jan-jaǵyn qymtap jatsam ǵoı? Oblystyq densaýlyq saqtaý basqarmasynyń bastyǵyn túrttim.

–Oıan, qazaq...

–Oıanbaıtyn qazaqpyn... –degen ol basyn ary qaratyp, qorylǵa basty. Mynalar qyzyq–eı? Oblys ákiminiń kózinshe uıqyǵa basty! Dereý kómekshime telefon soǵyp, dybys kúsheıtkish aldyrdym.  Sóıttim de:

–Oıanyńdar, qurmetti maýbastar! –dep aıqaı salyp edim, bári ushyp turdy. Sasqalaqtaǵandary qol shapalaqtady...

–Máseleni tús kórip sheship jatyrsyzdar ma? –dep suradym bárinen, –otyryńyzdar!

Jınalysty ármen qaraı jalǵastyrǵanym sol, artqy jaqtan poıyzdyń  daýysy estilgendeı me? Yńǵors–qors, yńǵors–qors... Bireý sandyraqtap jatyr: «Bizdiń jótelimiz: Aılyǵymyzdy kóterińiz!» Taǵy bireý: «Ustańdar, ustańdar, qashyp kettiii!» dep sandyraqtaı ornynan ushyp turdy da, esikke qaraı júgirip, artynsha bireýdi qýalaı jónelip, joq boldy... Bári qalyń uıqyǵa ketti. Meniń de uıqym kelip, esinep aldym. Biraq oblys ákiminiń uıyqtaýǵa quqy joq!

–Oıan qazaq, bolma mazaq! –dep daýys kúsheıtkishpen  sóılep edim, bári oryndarynan ushyp turysty. Taǵy da qol shapalaqtadym. «Uıyqtaǵandaryńyz úshin bárińizge bonýs!» dep edim, olar qýana qol shapalaqtady. Uzaq. Siz de qol shapalaqtap qoıyńyz, aǵaıyn! Meniń áńgimeme uıqyńyz kelip ketken joq pa a?

Muhtar SHERİM