Sońǵy on kúnde aýa-raıy kúrt sýyp ketti. Kómir tapshylyǵy halyqqa erekshe sezilip jatyr. Bir ǵana Almatynyń ózinde kómir tappaı sandalǵan jurtta esep joq. Máselen, Bekmahanov kóshesinde ornalasqan «Álem kómir» kompanıasynda kómir satylmaıdy. Kompanıa ókilderi «kómir tek 3 aptadan keıin biraq bolady» dep aýyzdaryn qý shóppen súrtip otyr. Erikti tilshimiz Erlan Tóleýbaı máseleniń mán-jaıyn bilý úshin atalmysh mekemege bardy. 

«Álem kómirdiń» aldynda topyrlap turǵan adamdar Shamalǵan, Baıserke jaqtan otyn taba almaı, aqyrǵy úmittiń jetegimen osynda kelgen. Alaıda kompanıa qyzmetkerleri munda da kómir joq ekenin málimdepti. Erikti tilshimiz túsirgen vıdeoda kómir alyp shyǵyp bara jatqan aýyr júk kólikterin kórýge bolady. Bul júk kólikterin ótkizip otyrǵan kompanıa qyzmetkerleriniń sózinshe, kómirdi áketip jatqan azamattar erte qamdanyp, aldyn ala tapsyrys bergen.

Kómir tapshylyǵynyń sebebin anyqtaý maqsatynda jýrnalıs Erlan Tóleýbaı kompanıa basshylarymen tildespek edi, biraq olar ornynda bolmaı shyqty. Qashan keletinderi de belgisiz eken.

Qystyń qahary qatty. Oǵan kómirdiń qymbattaǵanyn qosyńyz. Turǵyndardyń aıtýynsha, bıyl kómirdiń sapasy da nashar. Saqyldaǵan sary aıazda úıdi jylytýǵa kúshi jetpeıdi.