Búgin Úkimet úıinde Qazaqstan Respýblıkasy Premer-Mınıstri Baqytjan Saǵyntaevtyń tóraǵalyǵymen áleýmettik áriptestik pen áleýmettik jáne eńbek qatynastaryn retteý jónindegi Respýblıkalyq úshjaqty komısıa otyrysy ótti, dep jazady Qamshy.kz aqparat agenttigi.
Komısıa jumysyna QR Kásipodaqtar federasıasynyń, Qazaqstan Eńbek konfederasıasynyń, Taý-ken óndirý jáne taý-ken metalýrgıa kásiporyndarynyń Respýblıkalyq qaýymdastyǵynyń basshylary, sondaı-aq selektor rejıminde oblys ákimderiniń orynbasarlary qatysty.
Otyrys barysynda memlekettiń áleýmettik-eńbek saıasaty jáne «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýynda QR Prezıdenti N. Nazarbaev júktegen mindetterge sáıkes elimizdiń azamattary úshin laıyqty eńbek jaǵdaılaryn jasaý máseleleri talqylandy.
Otyrys barysynda áleýmettik-eńbek qatynastaryn retteýdiń negizgi baǵyttary boıynsha taraptardyń kelisilgen pozısıalaryn anyqtaıtyn Qazaqstan Respýblıkasy Úkimeti, respýblıkalyq jumyskerler birlestikteri jáne respýblıkalyq jumys berýshiler birlestikteri arasynda 2018-2020 jyldarǵa arnalǵan Bas kelisimge qol qoıyldy. Bas kelisim aıasynda qabyldanǵan mindettemelerdi iske asyrý boıynsha İs-sharalar jospary (Jol kartasy) qaraldy jáne bekitildi.
Qujatqa áleýmettik áriptestik jáne áleýmettik-eńbek qatynastaryn retteý jónindegi Respýblıkalyq úshjaqty komısıanyń taraptary qol qoıdy: Úkimetten – QR Premer-Mınıstriniń orynbasary E. Dosaev, jumyskerler birlestikterinen – Kásipodaqtar federasıasynyń tóraǵasy B. Ábdiraıym jáne Qazaqstan eńbek konfederasıasynyń bas hatshysy – M. Mashkenov, jumys berýshiler birlestikterinen – «Atameken» Ulttyq kásipkerler palatasynyń basqarma tóraǵasy A. Myrzahmetov, Jumys berýshiler konfederasıasynyń basqarma tóraǵasy Q. Baıkenov, Taý-ken óndirý jáne taý-ken metalýrgıa kásiporyndarynyń Respýblıkalyq qaýymdastyǵynyń atqarýshy dırektory, Qazaqstan taýar óndirýshileri jáne eksporttaýshylar odaǵynyń prezıdenti N. Radostoves.
2018-2020 jyldarǵa arnalǵan Bas kelisim ekonomıkany tehnologıalyq jańǵyrtý, bıznes ortany túbegeıli jaqsartý, halyqty formaldy jáne ónimdi jumyspen qamtýǵa járdemdesý, adamı kapıtal sapasyn, eńbek jaǵdaılary men qorǵaýdy jaqsartý, sondaı-aq ónerkásiptik jáne ekologıalyq qaýipsizdik máselelerine qatysty boldy.
Anyqtama: QR Eńbek kodeksiniń 152 babyna sáıkes respýblıkalyq deńgeıde Qazaqstan Respýblıkasy Úkimeti, respýblıkalyq jumys berýshiler birlestikteri jáne respýblıkalyq kásibı odaqtar birlestikteri arasynda Bas kelisim jasalady.
Bas kelisim ár 3 jyl saıyn jasalady. 2017 jyly 2015-2017 jyldarǵa arnalǵan Bas kelisimniń merzimi aıaqtaldy.
2015-2017 jyldarǵa arnalǵan Bas kelisimde qarastyrylǵan sharalardy iske asyrý nátıjesinde jalpy áleýmettik-eńbek qatynastary salasynda kórsetkishter jaqsardy.
3 jylda elimizdiń kásiporyndarynda óndiristik jaraqattaný 1,4% azaıdy. Elimizdiń orta jáne iri kásiporyndarynda ujymdyq-sharttyq qatynastarmen qamtý 3,1% artty.
Elimizdiń 1 400 astam kásiporny Halyqaralyq eńbek uıymdary (OHSAS 18001, HEQ-EQBJ) usynǵan qaýipsizdik jáne eńbekti qorǵaý boıynsha standarttar engizdi.
12 myńnan astam Óndiristik keńester quryldy, olardyń quramyna bara-barlyq negizde jumys berýshiler men jumyskerlerdiń ókilderi kiredi.
